966 Бардыгы /

          БАТКЕН. Баткен облусуна караштуу Кадамжай жалпы дарыгерлер практикалык борборуна (Кадамжай ЖДПБга) заманбап компьютердик томография орнотулду. Бул туурасында Президенттин Баткен облусундагы өкүлчүлүгүнөн кабарлашты.

          Маалыматка карагандаа, аталган компьютердик томография аппараты Кытай компаниясынын колдоосу аркасында мамлекеттик-жеке өнөктөштүктүн алкагында гана орнотулду. Бул иш-чарага саламаттыкты сактоо министри Алымкадыр Бейшеналиев жана Кадамжай районунун акими Кутпидин Шакиров катышышты.

Айтмакчы, булл заманбап медициналык аппараттын баасы 360 миң долларды чапчыйт. Компьютердик томография райондун жашоочулары үчүн зор жаңылык болуп эсептелет. Алыс жолго убакыт коротпостон, райондун борборунда томографияга текшерилүүгө шарт жаратылып олтурат.  Медициналык аппаратты колдонуу жана диагностикалоо үчүн атайын адистер окутулуп жатат. Кадамжай районунун акими Кутпидин Шакиров бул демигени кубаттай тургандыгын жар салып, калкка сапаттуу медициналык кызмат көрсөтүү бара-бара жакшырып бараткандыгын моюндапды.

Баса, Кадамжай ЖДПБ 259 керебетке эсептелип, 13 бөлүм жана 5 филиал, 19 УДТ, 24 ФАПтан куралган. Саламаттыкты сактоо министри Алымкадыр Бейшеналиев жана Кадамжай районунун акими Кутпидин Шакиров медицина кызматкерлери менен тармактагы көйгөйлөрдү дагы ченен-чонон талкуулашты.

Алишер ТОКСОНБАЕВ, өз кабарчы