1,575 Бардыгы /

Жикчил Тоолуу Карабак республикасынын мурдагы үч президенти – Араик Арутюнян, Аркадий Гукасян жана Бако Саакаян кармалды. Бул тууралуу азербайжан басылмалары азери өкмөтүндөгү булактарына шилтеме кылып кабарлашты.

АПА агенттиги үч экс-президент тең Степанакертте кармалып, Бакуга жеткирилгенин жазды. Буга чейин Азербайжандын бийлиги Арутюнянга эл аралык издөө жарыялаган.

Мындан тышкары азери аскерлери Тоолуу Карабактын парламентинин мурдагы спикери Давид Ишханянды да кармаганы кабарланууда.

Report агенттиги белгилегендей, кармалгандардын баары тең “көптөгөн кылмыштарга айыпталууда” жана жакында сот алдында жооп беришет.

Азырынча бул маалыматтар расмий түрдө ырастала элек.

29-сентябрда Азербайжандын күч түзүм кызматкерлери Тоолуу Карабак армиясынын мурдагы башчысы Левон Мнацаканянды жана “коопсуздук кеңешинин” экс-төрагасы Аршавир Гарамянды кармаганы белгилүү болгон.

28-сентябрда сот жикчил Тоолуу Карабак республикасынын мурдагы өкмөт башчысы, миллиардер Рубен Варданянды төрт айга камакка алуу чечимин чыгарган. Ага “Терроризмди каржылоо”, “Мамлекеттик чек арадан мыйзамсыз өтүү”, “Мыйзамсыз куралдуу түзүм түзүү жана анын ишмердүүлүгүнө катышуу” беренелери боюнча айыптар тагылган.

19-сентябрда Азербайжан Тоолуу Карабакта “антитеррордук операция” баштаганын жарыялаган. Эртеси күнү жикчил аймактын лидерлери Бакунун шарттарына макул болуп, багынып беришкен.

Сентябрдын соңунда Тоолуу Карабак түзүмү 2024-жылдын 1-сентябрынан тартып жоюлары тууралуу буйрукка кол коюлган.

WWW.