540 Бардыгы /

Улуттук коопсуздук боюнча мамлекеттик комитети (УКМК) Жазаларды аткаруу кызматынын Ош шаарындагы №25-мекемесинин (тергөө  абагынын) жетекчиси Жаныбек Ураимов атайын кызматтын убактылуу кармоочу жайына киргизилгендигин эми гана ачыктады. Анткени, айыпталучу – тергөө абыгынын жетекчиси “Өзү башкарган жабык жайга маңзат ташууну калкалаган” деп шектелип жатат.

Маалыматка карганда, атайын кызмат менен Ош шаардык ички иштер башкармалыгы №25-мекемесине соңку тапта маңзаттарды ташып саткан каналды таап аныктап, анын ишине акыры бөгөт дагы койду. Тергөөнүн жүрүшүндө  кылмыштуу схеманы №25-тергөө абагында жаткан Кыргызстандын жана Татарстандын жарандары уюштурушкандыгы, алар “Женго” каймана аты менен белгилүү кримтөбөл Кадырбек Досоновдун уюшкан кылмыштуу тобунун мүчөсү экендиктери эми гана аныкталып олтурат. Ошентип, жүргүзүлгөн ыкчам-издөө иш-чараларынын алкагында кылмышка шектүү катары Ош шаардык жаза аткаруу кызматынын №25-мекемесинин башчысы Ж.У., мекеменин башка жооптуу кызматкерлери менен жең ичинен сүйлөшүп алышып, атайын мекеменин аймагына маңзаттарды тоскоолдуксуз өткөргөндүгү үчүн системалуу түрдө акча дагы алып турушкан. Бул схема боюнча Тажикстандын жараны Согдий облусундагы каналдары аркылуу, Оштогу №25-тергөө абагында жаткан адамдарга маңзатты ай сайын жеткирүү каналдарын толук кандуу уюштурган. Ал каражатты Жаныбек Ураимов, абактагы “положенец” деп аталган А.Т жана башка адамдар өз ара бөлүшүп тургандыгы кошо такталды.

Атайын тинтүүнүн жүрүшүндө Оштогу №25-мекемесине маңзатты өткөрүү аракети учурунда, тамак-аш азыктарынын арасына катылган 1 килограмм ооган гашиши дагы алынды. Мындан тышкары тергөө жайына маңзат алып кирүүгө аракет кылган дагы төрт киши кармалды. Булардын арасынан эки адамдан №25-абакка киргизүүгө багытталган 1,3 килограмм ооган гашиши кошо табылып олтурат.

Баса, Жазаларды аткаруу кызматынын Ош шаарындагы №25-мекемесинин жетекчиси Жаныбек Ураимов  атайын кызматтын, ал эми дагы төрт адам – анын шериктери Ош шаардык ички иштер башкармалыгынын убактылуу кармоочу жайына киргизилди. Кармалгандардын жактоочулары менен жакындары азырынча комментарий берише элек. Окуя тууралуу Адилет министрлигине караштуу Жаза аткаруу кызматы дагы азырынча маалымат тараткан жок!

Алишер ТОКСОНБАЕВ, өз кабарчы