231 Бардыгы /

          Кыргыз Республикасынын УКМКсына караштуу мамлекеттик Чек ара кызматынын маалымат жана коммуникация башкармалыгы социалдык тармактарда 2028-аскер бөлүгүнүн санитардык нускоочусу, кенже сержант Ж. Асанакунованын ВидеоКайрылуусунда айтылган маалыматы боюнча буга чейин дагы УКМК Чек ара кызматынын жетекчилиги, ошондой эле көзөмөлдөө жана компетенттүү органдар тарабынан тыкыр иликтөөлөр жүргүзүлгөндүгүн ырастады.

          Атайын кызматтык тыкыр иликтөөнүн жүрүшүндө кенже сержант Ж. Асанакунова “прапорщик” аскердик наамы ыйгарылышы менен дарыкана башчысы кызмат ордуна  дайындалууга кызыкдар болгондугу чындап аныкталды. Бирок, жагдайды эске алуу менен (“дарыкана башчысы” кызмат ордундагы аскер кызматчы ден соолугуна таасир тийгизиши мүмкүн  болгон  бийик тоолуу аймактарда жайгашкан аскер тарамдарга ар дайым чыгып туруусу шарт. Ал эми Ж. Асанакунова өзү жалгыз жашы жетиле элек үч баланы тарбиялайт) Ж. Асанакунованы бул кызматка дайындоо мүмкүн эместиги анын өзүнө дагы ачык айтылган. Ошондой эле тыкыр текшерүүлөрдүн жыйынтыгында  2028-аскер бөлүгүнө “Өлүк малдын” эти жана башка сапатсыз азык-түлүктөр алынып келет деген маалымат дагы таптакыр тастыкталган эмес! Анткени, 2028-аскер бөлүгүнө азык-түлүктөрдүн сатып алынышы боюнча маалымдасак, бардыгы “Мамлекеттик сатып алуулар жөнүндө” Кыргыз Республикасынын  Мыйзамынын чегинде   сынактык соодалашуу (тендер) аркылуу гана сатып алынган. Тез бузулуучу азык-түлүктөрдү сатып алуу (эт, май, колбаса, сыр, жумуртка) жергиликтүү камсыздоочулар арасынан тандоо иретинде гана жүргөн. Сатып алынган азык-түлүк алынып келгенде комиссия курамы тарабынан сапаты жана жарактуу мөөнөтүү тыкыр түрдө текшерилет. Аскер кызматчылары үчүн даярдалган тамак-аштын сапаты ар күн сайын көзөмөлгө дагы алынат.  

          Ошентип, чыныгы иликтөөлөрдүн учурунда мөөнөттүү кызмат өтөп жаткан аскер кызматчылары менен ачык-айкын маектешүүлөр  жүрүп, а түгүл денелери дагы кароого алынып жана анонимдүү сурамжылоолор жүргүзүлүп, алардын жыйынтыгында аскердик Уставга туура келбеген мамилелер жана аскер кызматчылары алган жаракаттардын жашырылган фактылары болгондугу дээрлик аныкталган жок!

          Ошентип, дагыле обьективдүү иликтөөлөр жүргүзүлүшү үчүн 2024-жылдын 3-февралында кенже сержант Ж. Асанакунова мамлекеттик Чек ара кызматынын жетекчилиги менен өз ара маектешүүгө дагы чакырылган. Ушул тапта 2028-аскер бөлүгүндө кайрадан Кыргыз Республикасынын УКМК жана Аскердик прокуратура тарабынан тыкыр текшерүүлөр жүргүзүлүүдө. Алардын жыйынтыктары туурасында дагы кийинчерээк кошумча маалымдалат.  

Алишер  ТОКСОНБАЕВ, өз кабарчы