963 Бардыгы /

ЖАЛАЛ-АБАД. 18-апрель  күнү Ала-Бука районунун Абдырахман  Ботоев  атындагы  №34  жалпы  негизги  билим  берүүчү  мектебинин 3-классында башталгыч  класстарынын  мугалими  Мусаева  Батма тарабынан STEAM билим  берүү программасын  ишке ашыруунун  негизинде “Мен – чилистен” деген  темада  ата-энелер  жана  окуучулар менен  биргеликте  таймаш  өткөрүлдү.

Максаты баланы коомдо өз алдынча  жашоого  даярдоодо  ата-энелердин,  мугалимдердин  жана  аны  тарбиялоого  катышкан башка  чоң  адамдардын  негизги  милдеттери,  балдардын өзүн-өзү  алып  жүрүүсү, окуганды, жазганды,  санаганды билүү  менен  гана  чектелип  калбастан, башталгыч класстардагы бала  курагында  эле эмгектенүү, эмгек акы,  сый  акы,жоопкерчилик, улууларды урматтоо жана  башкалар  жөнүндө  билүү  керектиги  жөнүндө.

Акча  менен  байланышкан  туура  адаттарды,  финансылык  жактан  сабаттуу  жүрүм-турум  мамилелерин  калыптандыруу керек  экендиги  боюнча да  кеңири  түшүнүк  берилди.  Ошол себептен  балага  үйдөн  ата-энелер туура  тарбия  берүү менен  келечекте  финансылык  туура  чечимдерди  кабыл  алууга, өз акчасын туура  колдоно билүүгө,  туура  максат  коюусуна жардам  берүүлөрү  зарыл  экендиги  боюнча да  кеңири  айтылып  өтүлдү.

      Таймаш  алты  шарттан  түзүлүптүр.

Биринчи шарт: “Өз колуң  менен  акча  топтоочубуюм  жаса”;

Экинчи  шарт: үй  тапшырмасын  коргоо;

Үчүнчү  шарт:  “Блиц  суроолор”;

Төртүнчү  шарт:  “Биздин  каржылык  абалыбыз  кандай?”;

Бешинчи шарт: акча чогултуу  боюнча  кеңештер;

Алтынчы шарт:  жыйынтыктоо.

Бул  таймашка  мугалимдер  жана  ата-энелер  катышты.

Таймашка  келген  ата-энелер берилген  шарттарды окуучулар  менен  бирге кызыгуу  менен аткарып  жатышты. Активдүү катышкан  окуучулар жана  ата-энелер  мугалим  тарабынан мактоо  баракчалары  менен  сыйланышты.

Таймаштын  аягында  катышууга  келген  ата-энелер  3-класстын  класс  жетекчиси Мусаева  Батма  эжекеге  рахмат  айтуу  менен  бирге  ыраазычылык  билдирип  кетишти.

Таймаш  өтө жогорку  деңгээлде өткөрүлдү. Мына  ушундай  класстан  тышкаркы  иштерди  көбүрөөк  өткөрсөк, ата-энелер  менен  мектептин  ортосунда  тыгыз  байланыш  болот.

Даярдаган:  Нурийла   Жоробаева,  Абдырахман Ботоев атындагы №34 жалпы негизги  билим  берүүчү  мектебинин  кыргыз  тили  жана  адабияты  мугалими , Ала-Бука району