2,784 Бардыгы /

Өзбекстанда мамлекеттик тилди билбегендер мамлекеттик кызматтарда гана иштей албастан, мамлекеттик кызматтарды да пайдалана албагыдай болушу керек. Бул тууралуу өзбек парламентинин төмөнкү палатасынын спикери, “Улуттук кайра жаралуу” партиясынын лидери Алишер Кадыров билдирди.

“Орусияда иштегиси келгендер орус тилин билиши керек. Бирок эмнегедир Өзбекстанда жашап жаткан орусиялыктар үчүн өзбек тилин билүү милдеттүү эмес”, – деп жазды саясатчы Telegram-каналына.

Ал мындай билдирүүсүн Мамлекеттик Думанын спикери Вячеслав Володиндин сөздөрүнө жооп катары жазды. Володин буга чейин “Орусияга орус тилин билген жана өлкөнүн салтын сыйлаган адамдар гана иштегени келгени маанилүү экенин” айткан.

Кадыровдун пикиринде, Өзбекстанда жашаган жана бул өлкөнүн жараны болгон бардык улуттардын өкүлдөрү улуттук тилди билиши керек.

“Башка улуттагы мекендештер мамлекеттик тилди үйрөнүшү үчүн бала бакчалар менен мектептерде шарттарды түзүүдөн тышкары, өзбек тили мыйзам менен милдеттүү тил катары аныкталышы керек”, – деди ал.

Алишер Кадыров буга чейин да бир нече жолу коомчулукта кызуу талаш жараткан билдирүүлөрдү жасаган. Быйыл январдын аягында ал өлкө мектептериндеги орус тил сабактарынын сааттарын кыскартууну сунуштаган.

“Мисалы, калктын 3 пайыздан аз бөлүгүн түзгөн орус улутундагы мекендештердин арасында билим берүү жана телеберүү тармактарында орус тили өтө кеңири пайдаланылат. Бул дисбалансты жоюу керек”, – деп жазган ал “Фейсбуктагы” баракчасына.

Анда Кадыров мындай пикирин орусиялык ашкере улутчул жазуучу Захар Прилепин менен тарыхчы Михаил Смолиндин айткандарына жооп катары жазган. Прилепин Өзбекстан Орусиянын курамына кошулушу керектигин айтса, Смолин СССР түзүлгөнгө чейин өзбектер, казактар жана азерилер улут катары болбогонун, өзбектер “бир нече улуттун биригүүсүнөн” пайда болгонун билдирген.

WWW.