318 Бардыгы /

Улуттук коопсуздук боюнча мамлекеттик комитет (УКМК) атайын техникалык каражаттарды мыйзамсыз жүгүртүүгө каршы иш-чаралардын жүрүшүндө Ошто жашыруун жабдылган терминалды акыры аныктады. Бул тууралуу аталган мекеменин басма сөз кызматынан  кабарладшты.

Баса, 24 жаштагы У.А. аттуу жарандын үйүндө 19 SIM-бокс, 8 персоналдык компьютер, 2 ноутбук, мобилдик операторлордун 2000ден ашык SIM-карталары табылды. Алар интернет алдамчылыгына, социалдык тармактар аркылуу жалганмаалыматтарды жана басылмаларды жайылтууга, криптовалюталарды уурдоого гана колдонулган. Муну менен катар мобилдик мессенжерлердеги, банктык эсептердеги жана электрондук капчыктардагы фейк аккаунттар мыйзамсыз катталган. Аталган терминалдын кызматынан экстремисттик жана террордук уюмдардын мүчөлөрү дагы активдүү колдонушу мүмкүн экендиги дагы кабарланды.

Терминал – бул көп сандагы SIM-карталарды кошуу, сактоо жана бир жолку СМС  активдештирүү коддорун алуу мүмкүнчүлүгү менен бирдиктүү шлюзга интеграцияланган техникалык каражаттардын комплексин түшүндүрөөрүн билдирди. Бул кызмат «smshub.org» веб-сайтында жеткиликтүү болуп, эсептерди, же электрондук капчыктарды активдештирүү үчүн дүйнөнүн каалаган өлкөсүнөн, анын ичинде Кыргызстандан телефон номерлери бар SIM-картаны сатып алууга мүмкүнчүлүк түзүлгөн. Ош шаарында аныкталган терминал аталган мыйзамсыз сайттын дилердик пункттарынын бири болгон.

Ошентип, аталган фактынын негизинде Кыргыз Республикасынын Кылмыш-Жаза Кодексинин 266-беренеси (Fтайын техникалык каражаттарды мыйзамсыз өндүрүү жана жүгүртүү) менен кылмыш иши козголду. Республиканын аймагында бул кызматтардан пайдаланган адамдарды аныктоо боюнча тергөө-ыкчам иш-чаралары жүргүзүлүп, тиешелүү экспертизалар дагы дайындалды. Маалыматта фактка байланыштуу канча киши кармалганы такталган эмес. УКМК интернетте алдамчылык жана жеке маалыматтарды уурдоо фактылары көбөйүп жаткандыгына байланыштуу жарандарды өзүнө сак болууга чакырат.

Алишер ТОКСОНБАЕВ, өз кабарчы