180 Бардыгы /

Тажикстан менен ирегелеш Көк-Терек айылындагы Достук-Ак-Сай автоунаа жолундагы көпүрө дагы бузулуп, каттам убактылуу токтотулду. Бул туурасында Транспорт жана коммуникациялар министрлигинин маалымат кызматынан билдиришти.

Аталган ведомстводон маалымдашкандай, ушул тапта аталган көпүрөнү биргеликте кайрадан калыбына келтирүү боюнча сүйлөшүүлөр кызуу жүрүп жатат. Бул тууралуу кошумча маалымат дагы берилет.

Белгилей кечү жагдай: күн мурун 16:00дөр чамасында Баткен облусунда нөшөрлөп жааган жамгырдан улам Айгүл-Таш-Согмент-Таян (3-9-чакырымдар аралыгы), Сох-Кан-Зардалы (29-31-чакырымдар аралыгы), Коргон-Катран-Баул (0-15-чакырымдар аралыгы) жана Ош – Баткен – Раззаков унаа жолунун 313-330-чакырымдар аралыгы менен ушул эле жолдун Баткен – Боз-Адыр тилкесинде каттам убактылуу жабылган.

«Кыргызавтожол-Түштүк» мамлекеттик ишканасынын №2-жана №13-Жол тейлөө мекемесинин кызматкерлери тарабынан тынымсыз тазалоо иштеринин натыйжасында Баткен – Боз-Адыр жолу эки тараптуу ачылып, калган унаа жолдордо бир тараптуу гана каттам берилген.

Азыркы тапта селдин кесепеттерин жоюу, андан ары автоунаа жолдорун кеңейтүү иштери кызуу жүргүзүлүүдө.

Алишер ТОКСОНБАЕВ, өз кабарчы