180 Бардыгы /

Баткен электр тармактар ишканасы Баткен облусунун селге кептелген айылдарында зыянга учураган электр мамыларын кайрадан калыбына келтирүү иштерин абдан кызуу жүргүзүп жаткан чагы. Бул туурасында аталган ишкананын басма сөз кызматынан билдиришти.

Маалыматка караганда, үстүбүздөгү жылдын 10-июль күнү саат 16:00 чамасында Баткен облусунун аймактарында катуу жамгыр жаап, натыйжада Баткен жана Лейлек райондорунда катарынан сел жүргөн. Мунун кесепетинен Баткен районунун Актатыр, Самаркандек жана Кара-Булак айылдарында жалпы жонунан 12 даана мамычалар жыгылып, 5 даана мамычанын астын суу баскан. Мындан тышкары 4 даана электр мамычасы толугу менен жараксыз кейипти кийген.

Сел жүргөн сааттан баштап Баткен электр тармактар ишканасынын директору Каныбек Маркаевдин буйругу менен райондук электр тармактар ишканаларынын энергетиктери жерине чыгып, түнү менен калыбына келтирүү иштерин жүргүзүп, андан соң калкка электр жарыгы берилди.

Бүгүнкү күндө энергетиктер сел алып, жол жабылып, кечинде бара албай калышкан аймактарга катташып, электр мамыларын кайрадан калыбына келтирүү иштерин жеринде кызуу улантып жатышат.

Белгилей кетчү жагдай: катуу селдин кесепетинен Баткен районунун сел алган айылдарында өзгөчө кырдаал режими дагы жарыяланган. Ушул тапта аталган аймакта Баткен электр тармактар ишканасынын 17 энергетик кызматкери жана дагы 3 атайын техникасы менен кызмат кылып жатышат.

Алишер ТОКСОНБАЕВ өз кабарчы