1,131 Бардыгы /

АКШ өкмөтү каржылаган USAIDдин “Ийгиликтүү аймак 2” долбоору 2021-жылдан бери 42 өнөктөш муниципалитетте 290 миң адамдын жашоосун оңдогонго жардамдашты. Бул демилгенин алкагында жаңыланган жана жаңы киргизилген 95 кызмат көрсөтүү ишке ашырылды.

Булардын арасында таза суу менен камсыздоо жана катуу тиричилик калдыктарын чыгаруу өңдүү негизги кызмат көрсөтүүлөрдөн баштап, балдар үчүн англис тили, музыка ийримдери жана спорттук секциялар сыяктуу кошумча класстан тышкаркы иш-чаралар дагы бар.

АКШнын Эл аралык өнүктүрүү боюнча агенттиги (USAID) жана Өнүктүрүү саясат институту (ӨСИ) каржылаган долбоор жыл сайын өтүп келаткан ири иш-чаралардын бирин – Аймактардын Форумун өткөрүүгө көмөктөштү. Аталган Форум жеринде кызмат көрсөтүүлөрдү жакшыртуу аркылуу айылдардагы жана шаарлардагы жашоонун сапатын ого бетер жогорулатуу боюнча пикир алмашууга багытталган платформага дагы айланды.

Быйылкы Форум аялдардын өз жамааттарында позитивдүү өзгөрүүлөрдү жайылтуудагы өзөктүк ролуна өзгөчө басым жасады. Форумга Баткен, Ысык-Көл, Жалал-Абад, Нарын жана Ош облустарынан мамлекеттик органдардын, жарандык коомдун уюмдарынын жана жергиликтүү өз алдынча башкаруу органдарынын 150дөн ашык өкүлү катышышты. Ар кайсы айылдык аймактардан келишкен лидер айымдар жергиликтүү Кеңештердин депутаттары, же жергиликтүү өз алдынча башкаруунун лидерлери сыңары өз тажрыйбалары менен дагы бөлүшүштү.

Алар жергиликтүү мыйзамдарды жана кызмат көрсөтүүлөрдү жакшыртууга кандайча жигердүү катышкандыгы жөнүндө кенен-чонон айтып дагы беришти. Лидер аялдар мыкты жыйынтыктарга жамааттарды артыкчылыктуу кызмат көрсөтүүлөрдү тандап алуу жараянынан байм-бай тартып, кайтарым байланышты түзүү аркылуу жетише алышты.

Кыздарыңызды, эже-карындаштарыңызды, жубайыңызды жана энелериңизди саясий турмушка, чечим кабыл алууга катышуу ниетин сөзсүз колдоп бериңиз! Башкаруу органдарында шайлануучу кызматка талапкерлигин көрсөтүүнү чечкен аялдарды дагы кубаттоону унутпаңыздар? Анткени, аялдар, бүгүн Аймактардын Форумунда өз тажрыйбалары менен бөлүшүп жаткан лидер аялдар менен таанышып, эч тайманбастан алардын жолун жолдогула! – деди Кыргыз Республикасынын Шайлоо жана референдум өткөрүү боюнча борбордук комиссиясынын төрайымы Нуржан Шайлдабекова.

USAIDдин Кыргыз Республикасындагы Миссиясынын директору Кайя Адамс айым жашоочулардын бакубатчылыгын жакшыртуу үчүн жарандык коом менен өкмөттүн ортосундагы кызматташуунун маанилүүлүгүн баса белгиледи:

– Бүгүн Форумда лидерлик жөнүндө чыныгы окуяларды айтып берүү менен биз аялдардын жетишкендиктерин ого бетер даңазалап жатабыз. Лидер аялдар өз жамааттарын инновациялык идеялар жана уникалдуу мүмкүнчүлүктөр аркылуу өзгөртүү менен туруктуулукту, көрөгөчтүктү жана боорукердикти көрсөтүшүп жатышат. 2021-жылдан бери USAIDдин “Ийгиликтүү аймак 2” долбоорунун алкагында 900дөн ашык муниципалдык кызматчы жана жергиликтүү Кеңештердин депутаттары окуудан өтүштү. Бул окуулар алардын кызмат көрсөтүүнү пландаштыруу, уюштуруу жана каржылоо көндүмдөрүн жогорулатты, ошондой эле жарандарды башкарууга тартууга дагы такай көмөктөштү.