225 Бардыгы /

Жалал-Абадда газдалган суу саткан жана тез татым жайларга рейд жүрүп жатат. Маалыматты Жалал-Абад шаардык мэриясынын маалымат кызматы билдирди.

Мындай текшерүү орун алган кырсыктан улам башталды. Анда мэрия тарабынан атайын жыйын өткөрүлүп, анын алкагында тийиштүү кызматтарга газ баллон иштетилген тез татым жайларын, газдалган суу саткан жайларды, ашканаларды текшерүү тапшырмасын берди.

Тапшырманын негизинде атайын комиссия шаардын борбордук базарда жана анын айланасын текшерди. Алдыда мындай рейд улантылат.

Буга чейин, 13-июлда социалдык тармактарга Жалал-Абад шаарындагы газдалган суусундук сатуучу жайлардын биринде жарылуу болуп, бир жаран каза болду делген маалымат тараган.

Окуя боюнча Президенттин Жалал-Абад облусундагы ыйгарым укуктуу өкүлүнүн маалымат кызматы жарылуу “Тору” соода борборунун маңдайында газдалган суу сатуучу жерде орун алганын жазган. Ошондой эле жарылуудан беш жаран түрдүү жаракат алып, бирөө жеринде каза болгону маалымдалган.

Жабырлануучулар тез жардам унаасы менен облустук клиникалык ооруканасына жеткирилип, дарыгерлердин көзөмөлүнө алынган. Учурда абалдары туруктуу деп бааланууда.