231 Бардыгы /

Ош шаарындагы сел каптаган борбордук базар эми калаадагы Жапалак айылындагы Көкүмбий көчөсүнө көчүрүлөт. Бул туурасында Ош мэриясынын басма сөз кызматынан кабарлашты. Баса, ушул жылдын 19-июнунда шаар башчысы Бакытбек Жетигенов базар көчүрүлө турган жер тилкесин көрүп чыкты. 

Маалыматта айтылгандай, курула турган жаңы базар Ош автоунаа базарынын жанындагы 16,7 гектар жер тилкесине жайгашат. Тиешелүү кызматтарга базарды көчүрүү боюнча даярдык иштерин баштоо тапшырмасы берилди. Мунун алдында Улуттук коопсуздук мамлекеттик комитетинин төрагасы Камчыбек Ташиев Ош шаарында селден жапа чеккендер менен жолугушуп, борбордук базар башка жерге көчүрүлө тургандыгын шарданы кылган. Ал Ак-Буура суусунун боюна салынган мыйзамсыз курулуштар, көпүрөлөр жана эс алуучу жайлары тазалана тургандыгын эскерткен. 

Айтмакчы, ушул жылдын 14-июлунда катуу жаандан кийин Ак-Буура дарыясы кадимкидей кирген. Аара чолодо кыян жүрүп, Оштогу борбордук базарды, ошондой эле чет жакадагы айылдарды сел каптаган. Беш киши каза таап, бир нече машинени сел агызып, үйлөр, көпүрө жана жолдор жарактан чыккан. Соодагерлер чоң чыгымга учураган. Ошто жана Кара-Суу районунда жүздөгөн турак жайлар зыян тартты. Ош шаарынын мэриясы борбордук базардын чыгымы эсептелип жаткандыгын, бул боюнча түзүлгөн атайын комиссия ишин жыйынтыктагандан кийин соода жайы ачыла турганын 17-июлда маалымдаган. 

Алишер ТОКСОНБАЕВ, өз кабарчы