990 Бардыгы /

АЛАЙГА КӨЧҮРҮЛГӨН ПАМИРЛИК КЫРГЫЗДАР КЕСИПТИК БИЛИМ АЛЫШТЫ

Ош облусунун Алай районунун Талды-Суу айылына көчүрүлүп келинген 30 памирлик кыргыз акыры кесиптик билим алышты. Эмгек, социалдык камсыздоо жана миграция министрлигинин маалыматына караганда, 15 аял тигүүчүлүктү, 15 эркек айдоочулук кесипти окушту. Эмгек министринин орун басары Бакыт Дарманкул уулу Ооганстандын Памир аймагынан көчүрүлүп келинген этникалык кыргыздардан кабар алды.

Маалыматка караганда, Талды-Сууда 17 үй-бүлө жашайт. Ар бир үй-бүлөгө бирден саан уй, жылкы жана 10 баш кой берилген. Алай райондук социалдык камсыздоо бөлүмүнүн маалыматы боюнча, 16 жашка чейинки 36 бала “Үй-бүлөгө көмөк” жөлөк пулун алат. Буга дейре Акыйкатчы институту мамлекеттик органдарды Ооганстандын Памир аймагынан Кыргызстанга көчүп келген этникалык кыргыздардын көйгөйлөрүнө көңүл бурууга чакырган. Аталган институттун өкүлдөрү памирлик кыргыздар жумушка орношо албай жатышкандыгын баса белгилеген.Алай районундагы Талды-Суу айылына этникалык кыргыздар 2019-жылы көчүрүлүп келинген. 2017-жылы Нарынга жайгаштырылган 50дөй памирлик кыргыздардын бир тобу Ооганстанга кайра кайтышкан.

2022-жылы июлда Кыргыз өкмөтү 2022-2024-жылдар аралыгында бюджеттен каралган 244,5 миллион сомго Ооганстандын Кичи жана Чоң Памиринде жашаган 1,5 миңдей этникалык кыргыз (400 үй-бүлө) көчүрүлүп келээрин билдирген. Чоң жана Кичи Памирдеги ооган кыргыздарынын жалпы саны 2 миңге чамалуу.

Алишер ТОКСОНБАЕВ өз кабарчы