3 Бардыгы /

Бүгүн, 30-апрелде Манас шаарында Кыргыз Республикасынын Президентинин Жалал–Абад облусундагы ыйгарым укуктуу өкүлүнүн биринчи орун басары Уларбек Исмаиловдун жетекчилиги алдында жол кыймылынын коопсуздугун камсыздоо боюнча облустук комиссиянын кезектеги жыйыны өткөрүлдү.

Жыйынга облустук ички иштер башкармалыгынын башчысы Марлис Асанов, жол кыймылынын коопсуздугун камсыздоо бөлүмүнүн, тиешелүү тармактардын жетекчилери офлайн, ошондой эле райондук мамлекеттик администрациялардын башчылары жана шаар мэрлери онлайн форматта катышты.

Отурумда 2026-жылдын биринчи кварталында облус аймагында жол-транспорт кырсыктарын алдын алуу, жол тыгындарын азайтуу жана жолдордун абалын жакшыртуу боюнча аткарылган иштер каралды.

Маалыматка ылайык, үч ай аралыгында облус аймагында 110 жол кырсыгы катталып, анын кесепетинен 13 адам каза болуп, 129 жаран жаракат алган. Жол кыймылынын эрежелерин бузгандыгы үчүн 41 миңден ашуун айдоочуга протокол түзүлүп, мас абалында унаа башкарган 700дөн ашуун учур аныкталган.

Жыйында “Бишкек–Ош” унаа жолундагы авариялык кооптуу тилкелер, жол инфраструктурасынын абалы, жол белгилерин жаңылоо, сызыктарды чийүү, ошондой эле айдоочуларды даярдоо жана транспорт каражаттарын камсыздандыруу маселелери талкууланды.

Ошондой эле жергиликтүү бийлик органдарына жана тиешелүү мекемелерге бир катар тапшырмалар берилди. Алардын ичинде:

-жол кырсыктарын алдын алуу боюнча түшүндүрүү иштерин күчөтүү;

-эс алуу күндөрү коомдук коопсуздукту камсыз кылуу жана рейддерди уюштуруу;

-жолдорду оңдоо, белгилерди жаңылоо жана кооптуу тилкелерди жабдуу;

-мал жандыктардын катышуусундагы кырсыктарды алдын алуу боюнча чараларды көрүү;

-айдоочулар жана жарандар арасында камсыздандыруу маданиятын жогорулатуу;

-жер-жерлердеги эндура жана квадроциклдардын эсебин тактоо жана ээлерин аныктоо иштерин жүргүзүп, жол коопсуздугуна коркунуч жараткан жарандарга чара көрүү.

Жыйында кабыл алынган протоколдук тапшырмалардын аткарылышы көзөмөлгө алынып, жыйынтыгы боюнча чаралар көрүлөөрү эскертилди.