3 Бардыгы /

Учурда Кыргыз Республикасынын Президентинин Жалал-Абад облусундагы ыйгарым укуктуу өкүлүнүн аппаратынын делегациясы Өзбекстан Республикасынын Наманган облусунда иш сапары менен жүрөт. Бул тууралуу өкүлчүлүктүн малымат кызматы билдирди.

Бул иш сапар облус башчысы Тилек Текебаевдин демилгеси менен уюштурулуп, делегацияны ыйгарым укуктуу өкүлдүн аппарат жетекчиси Манасбек Базылбеков жетектөөдө.

Делегациянын курамында ыйгарым укуктуу өкүлдүн аппаратынын кызматкерлери, Манас шаарынын жана Базар-Коргон районунун, ошондой эле облустук жана жергиликтүү бийлик органдарынын өкүлдөрү, мекеме-ишканалардын жетекчилери бар.

Иш сапардын негизги максаты, мамлекеттик органдардын, өнөр жай ишканаларынын жумушу менен жакындан таанышуу, ошондой эле мамлекеттик кызматкерлердин ортосунда тажрыйба алмашууну камсыз кылуу болуп саналат.

Белгилей кетсек, буга чейин эки өлкө башчыларынын катышуусунда Жалал-Абад жана Наманган облустарынын ортосунда кызматташууну бекемдөө жана андан ары тереңдетүү максатында “Жол картасы” кабыл алынган. Аталган документте соода-экономикалык, социалдык, билим берүү жана маданият тармактарын өз ара өнүктүрүүгө багытталган бир катар багыттар камтылган.