33 Бардыгы /

Кыргыз Республикасынын Президентинин Жалал-Абад облусундагы ыйгарым укуктуу өкүлү Тилек Текебаев Ысык-Көл облусунун Кажы-Сай айылында “Кыргызстандын тоолуу аймактарында геопарктарды түзүү жана өнүктүрүү келечеги” аттуу эл аралык симпозиумга катышууда. Бул тууралуу өкүлчүлүктүн маалымат кызматы билдирди.

Иш-чара Тоолуу аймактарды өнүктүрүү боюнча иш-аракеттердин беш жылдыгынын (2023–2027) алкагында уюштурулган. Симпозиум Кыргыз Республикасынын Президентинин Тоо маселелери боюнча атайын өкүлү Динара Кемелованын демилгеси менен эл аралык уюмдардын жана мамлекеттик органдардын колдоосунда өткөрүлүүдө.

Ага Жогорку Кеңештин, Президенттин Администрациясынын, тармактык министрликтердин, жергиликтүү өз алдынча башкаруу органдарынын, эл аралык уюмдардын жана эксперттик коомчулуктун өкүлдөрү катышууда.

Өз сөзүндө облус башчысы Тилек Текебаев өлкөдө экологиялык коопсуздукту камсыз кылуу, климаттын өзгөрүшүнө каршы туруу жана жаратылыш ресурстарын сарамжалдуу пайдалануу мамлекеттик саясаттын артыкчылыктуу багыттарынын бири экенин белгиледи.

Ошондой эле ал Кыргыз Республикасынын Президенти Садыр Жапаровдун демилгеси менен ишке ашырылып жаткан “Жашыл Мурас” улуттук кампаниясынын маанисине токтолуп, анын алкагында Жалал-Абад облусунда аткарылып жаткан иштер тууралуу маалымат берди.

Белгиленгендей, 2025-жылы облус аймагында 782 миңден ашуун көчөт отургузулуп, план 104,3 пайызга аткарылган. Ал эми 2026-жылы 800 миң даана көчөт отургузуу пландалып, учурда тиешелүү жумуштар жүрүп жатат.

Симпозиумдун алкагында катышуучулар геопарктарды түзүү аркылуу тоолуу аймактарды туруктуу өнүктүрүү, жаратылыш жана маданий мурастарды сактоо, туруктуу туризмди жана жашыл экономиканы өнүктүрүү маселелерин талкуулашууда.