183 Бардыгы /

Бүгүн, 30-апрелде Манас шаарында Достук аймактык башкармалыгында жайгашат 100 орундуу жаңы бала бакчанын курулушуна капсула салынды. Иш-чарага Манас шаарынын мэри Абдупата Маткаликов, шаардык кеңештин төрагасы Аскат Талант уулу жана жергиликтүү тургундар катышты.

Иш-чаранын жүрүшүндө шаар мэри Абдупата Маткаликов белгилегендей, №12 “Жылмаюу” балдар бакчасынын жаңы имараты балдардын коопсуз жана заманбап шартта тарбияланып, сапаттуу мектепке чейинки билим алуусуна кеңири мүмкүнчүлүк түзөт. Ошондой эле ал бул долбоор шаардагы мектепке чейинки билим берүү мекемелерине болгон жүктү азайтып, жаш үй-бүлөлөр үчүн маанилүү колдоо болоорун кошумчалады.

Мектепке чейинки билим берүү мекемеси калаанын Достук аймактык башкармалыгында жайгашат. Имарат эки кабаттан туруп, долбоорго ылайык анын аймагында балдар үчүн оюн аянтчалары, спорттук аянтча, жашылдандыруу иштери, ички жолдор жана тротуарлар, ошондой эле өрт коопсуздугун камсыздоочу резервуар жана башка тиешелүү инфраструктуралар каралган.

Курулуш иштери жергиликтүү бюджеттин эсебинен каржыланып, сметалык баасы 57 млн. 40 миң сомду түзөт. Жаңы балдар бакчасынын курулушун жыл аягына чейин бүткөрүү пландалууда.

Белгилей кетсек, №12 балдар бакчасынын эски имараты авариялык абалга келгендиктен анда тарбияланган балдар убактылуу №19 мектептин имаратына көчүрүлгөн.