192 Бардыгы /

Ош облустук бассейндик суу чарба башкармалыгынын жана Папан суу сактагычынын кызматкерлеринин иш-аракеттерин дыкат териштирген атайын комиссия жыйынтыгын акыры жар салды. Бул туурасында Ош облустук бассейндик суу чарба башкармалыгынын жетекчиси Руслан Абибиллаев кабарчыбызга билдирди.

Руслан Абибиллаевдин айтымында, жогорудагы атайын комиссия 2024-жылдын 14-июлундагы селдин кесепеттерин ар тараптуу жана калыс териштирүү максатында гана уюшулган.

Айыл чарба министрлиги түзгөн атайын комиссия жана Улуттук мамлекеттик коопсуздук комитети жөнөткөн комссия “Папан суу сактагычынан аккан суунун Ош шаарынын Ак-Буура дарыясындагы селге таптакыр тиешси жок!” деген корутунду чыгарышты. Мен билбейм, бирок, дал ошондо Өзгөчө кырдаалдар министрлиги тарабынан жогорку жетекчилерге натуура маалымат таратылган. Чоң чөйрөдө ошондой сөз дагы катуу жүрдү. Биз агызган суу селге себепкер болгон эмес! Кырсыкка чейин, мындайча айтканда, жамгыр жаай баштаганда эле биз Папан суу сактагычындагы сууну 50 пайызга азайтып, 30 кубга дейре түшүргөнбүз. Бул көлөм селге эч кандай таасирин тийгизбеген. Тескерисинче, бизге караштуу каналдар Оштогу селдин көбүрөөк суусун шаардан тышкары алып кетүүгө гана ыңгай жараткан. Ага дейре 59 куб метр суу бир айданбери эле агып келаткан. Ушул тапта селдин кесепеттери дээрлик жоюлуп, баары калыбына келтирлигенден кийин 66-69-куб метр сууну дагыле адаттагыдай чыгарып жатабыз, – деп агынан жарылды Ош облустук бассейндик суу чарба башкармалыгынын жетекчиси Руслан Абибиллаев.

Руслан Абибиллаевдин маалыматына караганда, ушул жылдын 14-июлунан кийин селдин кесепеттерин жойгонго дейре Папан суу сактагычынан сууну кое берүү дээрлик токтотулган. Ал мезгилде аталган суу сактагычта сууну көлөмү 220 миллион куб метрден ашкан. А ушул тапта 211 миллион куб метр суу бар. Бул көлөмдө дагы коопсуз көлөмгө – 200 миллион куб метрге дейре ылдыйлатуу аракети жасалууда. Айтмакчы, Папан суу сактагычынын жалпы сыйымдуулугу 240 миллион куб метрге ылайыкташкан. 

Эске сала кетчүү жагдай: ушул жылдын 19-июнунда Ош шаарында өткөн жыйында Кыргыз Республикасынын Министрлер кабинетинин төрагасынын орун басары, УКМКнын жетекчиси Камчыбек Ташиев 14-июлдагы Ак-Буура дарыясынын ого бетер ташкындашына жана Ош шаарынын борбордук базарын тегиз сел капташына Ош облустук бассейндик суу чарба башкармалыгынын жетекчиси Руслан Абибиллаевди жана дагы Папан суу сактагычынын кызматкерлерин айыптап, жоопкерчиликке тартууну абдан катуу эскерткен.

Алишер ТОКСОНБАЕВ өз кабарчы