492 Бардыгы /

Кыргызстандын башкалаасынын Биринчи Май районундагы Тоголок-Молдо көчөсүнүн 284 дарегиндеги мечиттин имаратында диний мекеме (медресе) мыйзамсыз ишмердүүлүгүн жүргүзүп келгендиги ырасталды. Бул туурасында УКМКнын басма сөз кызматынан билдиришти.

Маалыматка караганда, санитардык-эпидемиологиялык көзөмөлдөө борборунун, Биринчи май райондук мамлекеттик акимчилигинин жана мусулмандар дин башкармалыгынын өкүлдөрүнөн куралган ведомстволор аралык комиссия аталган мекеменин ишмердүүлүгүн комплекстүү текшеришти. Тактап айтканда, текшерүү маалында жогоруда аталган диний мекемеде 14 жаштан 18 жашка чейинки жашы жете элек балдар билим алып жатышыптыр. Ошондой эле аталган диний мекеменин тиешелүү уруксат берүүчү документтери жок болуп, Кыргыз Республикасынын дин жана билим берүү чөйрөсүндөгү мыйзамдарын, ошондой эле архитектуралык, курулуш жана санитардык-эпидемиологиялык нормаларды бузган бир катар фактылар дагы аныкталды. Кыргыз Республикасынын Дин иштери боюнча мамлекеттик комиссиясынын расмий маалыматтарына ылайык аталган диний мекемелер Реестрде катталбагандыгын жана тиешелүү түрдө мыйзамсыз иштеп жаткандыгын белгилей кетүү керек.

Ушул тапта медреселердин иши дароо токтотулуп, окуучулар ата-энелерине өткөрүлүп берилди. Ал эми мыйзамсыз диний иш-аракеттерди уюштургандарга карата Кыргыз Республикасынын мыйзамдарынын чегинде тиешелүү чаралар дагы көрүлмөкчү.

Алишер ТОКСОНБАЕВ, өз кабарчы