249 Бардыгы /

        Ош облусуна караштуу Кара-Суу районунда 5 жаштагы кызды үйүнөн уурдап кетип, сексуалдык мүнөздөгү зордук-зомбулук аракеттерди жасоого айыпталган жаран өмүр бою эркинен ажыратылды. Бул туурасында Ош облустук сотунун басма сөз кызматынан билдиришти.

        Маалыматка караганда, Кара-Суу райондук сотунун 2024-жылдын 14-августундагы өкүмүнүн негизинде айыпталуучу Э.уулу З. Кылмыш-жаза кодексинин 194-беренесинин 1-бөлүгү (Адамдын жеке менчигинде же башка укугунда турган турак жайга же башка обьекттерге анын эркине каршы мыйзамсыз кирүү), 165- беренесинин 4-бөлүгүнүн 1-пункту (он төрт жашка толо элек баланы уурдоо) жана 155-беренесинин 4-бөлүгү (жабырлануучуга, же башка адамдарга карата өзгөчө мыкаачылык менен жасалган сексуалдык мүнөздөгү зомбулук аракеттер) менен күнөөлүү деп табылды.

        Ошентип, айыпталуучу Кылмыш-жаза кодексинин 194-беренесинин 1-бөлүгү менен 2 жылга; – Кылмыш-жаза кодексинин 165-беренесинин 4-бөлүгүнүн 1-пункту менен мүлкүн конфискациялоо менен 10 жылга; Кылмыш-жаза кодексинин 155-беренесинин 4-бөлүгү менен мүлкүн конфискациялоо менен өмүр бою эркиндигинен ажыратылды. Ал эми Кылмыш-жаза кодексинин 77-беренесинин 3-бөлүгүнүн (эгерде жасалган кылмыштардын жок дегенде бирине өмүр бою эркиндигинен ажыратуу жазасы дайындалса, анда кылмыштардын жыйындысы боюнча акыркы жаза кыйла катуу эмес жазаны өмүр бою эркиндигинен ажыратууга сиңирүү жолу менен аныкталат)  негизинде жазаларды жарым-жартылай кошуу жолу менен биротоло Э.уулу З. мүлкүн конфискациялоо менен өмүр бою эркиндигинен ажыратылды.

        Ошентип, беш жашар кызды зордуктаган жаран жазасын өзгөчө тартиптеги түзөтүү абактарында өтөмөкчү. Баса, өкүмгө нааразы тарап Ош облустук сотуна апелляциялык тартипте даттанууга укуктуу.

Алишер ТОКСОНБАЕВ, өз кабарчы