9 Бардыгы /

Кыргызстандын Түштүк башкалаасынын бийлиги таза суу маселесин толук чечүү максатында жеке менчикке өтүп кеткен суу кудуктарын (скважина) кайтарып алуу аракети башталгандыгын шардана кылды. Ош шаарынын вице-мэри Сонунбек Жунусбаев жеке менчикке тартууланган суу скважиналары боюнча буга дейре Кыргыз Өкмөтүнө кайрылуу жолдонгондугун, ошондон кийин гана президенттик администрациядан атайын комиссия келип, маселе эми гана оң жагына чечилип жаткандыгын ачыктады.

– Биз жеке менчикке өтүп кеткен жети скважина боюнча Кыргыз Өкмөтүнө кайрылганбыз. Ошондо президенттик апараттан атайын комиссия келип, анын жыйынтыгында өз ыктыяры менен өткөрүлүп берилген скважиналар бар. Булардын экөө азыркы айтылып жаткан эки скважина. Ошол комиссия келип кеткенден кийин тез арада суу маселесин чечүү керек эле. Бул жерлер суу аябай жакшы чыккан кудук болуп эсептелинет. Ушул тапта эки скважина тең казылды. Ал мурунку мэрибиз Мелис Мырзакматовдун карамагында экен. Бирөөнү өз ыктыяры менен шаарга өткөрүп берди. Ал эми экинчисин өз каражатына казып, пайдаланууга ылайыкташтырды. Эми ушул эки суу кудугу толук кандуу ишке киргизилсе, бихде миңдеген үйлөргө суу жеткирүү мүмкүнчүлүгү жаралат. Айтмакчы, 450 миңден ашуун калк байырлаган Ош шаарында таза суу – эң башкы көйгөйлөрдүн бири. Жамгыр жааган сайын Ак-Буура дарыясы ыраса ылайланып, суу берүү калаада кээде эки-үч күнгө чейин токтотулган учурлар бар. Быйыл административдик-аймактык реформага ылайык, Ош шаарын курчаган бир нече айыл калаа курамына кошулган. Таза суу маселеси ошондон кийин ого бетер курчуган.

Алишер ТОКСОНБАЕВ, өз з кабарчы