33 Бардыгы /

Улуттук коопсуздук мамлекеттик комитетинин төрагасы Камчыбек Ташиев Кара-Кулжада 10 балалуу үй-бүлөгө өз эсебинен үй куруп,  акыры пайдаланууга тапшырды. Бул туурасында УКМКнын маалымат борборунан кабарлашты.

Бир күн мурун УКМК төрагасы Камчыбек Ташиев үч ай аралыгында бүт шарты менен курулуп бүткөрүлгөн жаңы турак жайды жергиликтүү тургундардын жана айыл аксакалдарынын катышуусунда Чырмаш Молдояровдордун үй-бүлөсүнө тапшырды. Чырмаш Молдояров – Кара-Кулжа районунун тургуну. Бул үй-бүлөдө 10 бала бешөөсүнүн майыптыгы бар. Молдояровдор көп жылдан бери үй салууга чамасы жетпей, жаңы турак жайга муктаж болуп келишкен. Мындан улам алар ушул жылдын март айында аргасындан УКМК жетекчиси Камчыбек Ташиевге кайрылашкан.

Ошентип, Молдояровдорго жаңы үй бардык заманбап жашоо-шарты менен тургузулду. Аталган үй-бүлөнүн кайрылуусуна жооп кылып, чукул арада жаңы үй салып тартуулаган Камчыбек Ташиевге ыраазы болушуп, бул алар үчүн чоң мааниге ээ экендигин  айтышып, жергиликтүү аксакалдар Кыргыз Өкмөт мүчөлөрүнө ак батасын беришти.

Алишер ТОКСОНБАЕВ өз кабарчы