9 Бардыгы /

        Ош облусунун алыскы Алай районунда 110-10 кВ «Бүлөлү» электр көмөк чордону курулуп жатат. Бул туурасында Энергетика министрлигинен билдиришти.

        Маалыматка караганда, Ош электр тармактары ишканасынын 110-35/10 кВ «Гүлчө» электр көмөк чордонунун Оро-Дөбө фидеринин узундугу 110 чакырым экендигне байланыштуу, кыш мезгилдеринде керектөө өскөн учурда керектөөчүлөргө ыңгайсыздык жаралып, кардарларга чыңалуу керектүү нормадан түшүп кетип жетишсиз болуп калган. Ушул муктаждыктан арылуу максатында энергетика министри Таалайбек Ибраевдин жеке тапшырмасына ылайык «КУЭТ» ААКсынын каржылоосунда Бүлөлү айылына 110-10кВ электр көмөк чордон курула баштады. Ушул тапта аталган көмөк чордон курулуучу жерди даярдоо, контурду жасоо жана электр жабдыктары менен комплектациялоо иштери кызуу жүрүп жатат.      Жогорку чыңалуудагы 2500 КВА кубаттуулуктагы трансформатор алынып келинип, курулуш иштерине керектелүүчү электр энергиясын пайдалануу үчүн 100 КВА трансформатор дагы орнотулду. Уга улай курулуш иштерине өтө керектелүүчү жабдыктар менен дагы толук камсыз этилди.

        Баса, «Бүлөлү» көмөк чордону курулуп бүткөн соң 2 миңден ашуун кардарды электр жарыгы менен камсыздайт жана Алай районундагы Бүлөлү, Күң-Элек, Мурдаш, Кызыл-Коргон, Будалык жана Кыркол айылдарынын чыңалуу боюнча көйгөйлөрү биротоло чечилет. Жогорудагы көмөк чордон куруунун негизги максаты – элге жарыкты сапаттуу, үзгүлтүксүз берүү жана техникалык жоготууну бара-бара азайтуу.

Алишер ТОКСОНБАЕВ, өз кабарчы