6 Бардыгы /

Министрлер кабинетинин төрагасынын орун басары – УКМК жетекчиси Камчыбек Ташиев Баткен облусуна караштуу Сүлүктү шаарындагы 2051 аскердик шаарчанын ачылыш аземине катышты.

        Атайын кызматтын маалыматына караганда, атайын багыттагы «Бөрү» аскердик бөлүгү аскерлердин кызматы жана жашоосу үчүн зарыл болгон бардык заманбап шарттар менен камсыз этилди. Кыргыз Өкмөтүнүн мүчөсү Камчыбек Ташиев аскер шаарчасындагы бардык шарттар менен кенен-чонон таанышты. Ошондой эле жеринен тийиштүү жетекчилерге тапшырмаларды дагы берди. Алдыда бул «Бөрү» аскердик бөлүгүн мындан дагы максималдуу жакшыртуу аракеттери көрүлөөрүн убадалады.

        – Мамлекетибиздин чек арасынын бекемдигин жана коопсуздугун туруктуу камсыз кылууда «Бөрү» атайын багыттагы аскерлерибиздин орду өзгөчө экендигин бүт эли-журтубуз жакшы билет. Андыктан, биз Сиздерге керектүү бардык аскердик каражаттар жана жашоо шарттар менен камсыз кылууга милдеткербиз! Мекен чегин көздүн карегиндей сактоодо Сиздер тарабынан көрсөтүлгөн эрдик жана баатырдыкты биз ар бирибиз ар дайым унутпастан, баалап-барктайбыз. Өлкө башчыбыздын тапшырмасына ылайык, Сиздерге жана жалпы чек арачыларга, аскерлерге жана жоокерлерибизге биз кам көрүүнү дагыле улантабыз. А Сиздер тараптан Ата-Журтубуздун чек арасына бекем чеп болуп, өз милдеттериңерди берилгендик менен аткарып беришиңизерге бекем ишенебиз! – деди Министрлер кабинетинин төрагасынын орун басары – УКМК жетекчиси Камчыбек Ташиев.

        Камчыбек Ташиев ошондой эле «Бөрү» атайын багыттагы аскер бөлүгүнүн кызматкерлери үчүн курулган турак жайын дагы өзүнчө көрүп чыкты. Аскерлердин үй-бүлөлүк жашоо-шарттарын жакшыртуу ишине мындан ары да өзгөчө көңүл бурулаарын катуу убадалады. «Бөрү» атайын багыттагы аскер шаарчасында аскердик штаб, ашкана, жатакана, спорт комплекси, мончо, эс алуу жайлары жана башка чек араны коргоо үчүн зарыл бардык заманбап каражаттар жайгаштырылган.

Алишер ТОКСОНБАЕВ, өз кабарчы