6 Бардыгы /

Кыргыз Республикасынын Президентинин Баткен облусундагы Өкүлчүлүгүнөн билдиришкендей, Өзбекстандан атайылап келишкен Республикалык адистештирилген илимдер практикалык жана терапиялык, ошондой эле медициналык реабилитация борборунун директорунун орун басары, медицина илимдеринин доктору, профессор Абдукаххор Фозилов жетектеген  дарыгерлерди Баткен облусунун башчысынын биринчи орун басары Маруфхан Тулаев кабыл алды.

        Коңшу өлкөнүн дарыгерлеринин Баткенге сапарынын эң башкы максаты – эки тараптуу кесиптик гуманитардык кызматташтыкты чыңдоо, тажрыйба алмашуу, ошондой эле эки өлкөнүн жарандарына медициналык дагы жардам көрсөтүү. Бул  дарыгерлер тобунун курамында тажрыйбалуу онколог, эндокринолог  жана онкогинекологдор бар. Алар  эки күн бою Баткен облустук үй бүлөлүк дарыгерлер борборунда Баткен облусунун жарандарын акысыз медициналык кароодон өткөрүшөт.

        Кыргыз Республикасынын Президентинин Баткен облусундагы Өкүлчүлүнүн биринчи орун басары Маруфхан Тулаев өз сөзүндө, дарыгерлердин бул сапары Кыргыз-Өзбек элинин бир туугандык жана акын кошуналык ынак мамилесин дагы бир ирет далилдеп, бекемдээрин баса белгилеп, облус жетекчилигинин жана Баткен элинин атынан терең ыраазычылыгын билдирди.

        Белгилей кетчүү жагдай: аталган сапардын алкагында, Баткен облустук үй-бүлөлүк дарыгерлер борбору менен Өзбекстандын Республикалык адистештирилген илимдер практикалык жана терапиялык, медициналык реабилитация борборунун ортосунда кызматташуу боюнча меморандумга дагы кол коюлду. Мындай иш аракеттер эки өлкө президенттери Садыр Жапаров менен Шавкат Мирзиёевдин эки тараптуу кызматташуу боюнча жетишилген макулдашууларынын иш-планынын жана жол картасынын негизинде жүзөгө ашырылууда.

Алишер ТОКСОНБАЕВ, өз кабарчы