21 Бардыгы /

        Ош мамлекеттик педагогикалык университетинде “Келечекке карай” аталышындагы мугалимдерге арналган II эл аралык Кыргыз-Орус форуму өтүп жатат.

        Аталган ЖОЖдун ректору, профессор Бекмырза Зулуев маалымдагандай, бул иш-чара Кыргызстандын Билим берүү жана илим министрлиги, Орусиянын М.Акмулла атындагы Башкыр мамлекеттик педагогикалык университети жана Ош мамлекеттик педагогикалык университети менен биргеликте уюштурулуп, ага Ош шаарынан жана Ош облусунун райондордон келишкен мугалимдер дагы катышып жатышат. Форумдун алгачкы бөлүгүндө коноктор үчүн атайын ачык эшик күнү уюштурулуп, андан соң көргөзмөлөр дагы коюлду.

        Ал эми форумдун экинчи бөлүгү чоң жыйындар залында улантылып, ага Кыргызстандын билим берүү министринин орун басары Муратбек Касымалиев, Ош шаарындагы Орусиянын Башкы консулдугунун өкүлү Валерий Катункин, Кыргыз Республикасынын президентинин Ош облусундагы ыйгарым укуктуу өкүлүнүн орун басары Талантбек Арстанкулов, Ош шаарынын вице-мэри Нурбек Кадыров, Ош шаарындагы Орус үйүнүн жетекчиси Авраам Дмитрий Николаевич, БатМУнун ректору Айдарбек Гыязов, Кыргыз билим берүү Академиясынын президенти Назира Дюшеева, Орусиянын М. Акмулла атындагы БГПУнун ректору Салават Сагитов жана Ош мамлекеттик педагогикалык университетининң ректору Бекмурза Зулуев катышышып, андан соң куттуктоо сөздөрүн сүйлөштү.

        “Келечекке карай” форуму өз ара практикалык тажрыйба алмашуу, кесиптик чеберчиликти өркүндөтүү, Кыргызстан менен Орусиянын адистеринин заманбап билим берүү тармагында эл аралык кызматташуусун түзүү максатында гана уюштурулуп, алдыда концерттик программа, мугалимдер үчүн интенсивдүү билим берүү, тегерек стол жана мастер-класстар дагы өткөрүлмөкчү.

Алишер ТОКСОНБАЕВ, өз кабарчы