27 Бардыгы /

Баткен облусунун борбору Баткен шаарында 1999-2000-жылдардагы коогалаңда аскердик милдетин аткарып жатып курман болушкан жоокерлерди эскерүүгө Президенттин Баткен облусундагы ыйгарым укуктуу өкүлүнүн башчысынын орун басары Тимур Мадияров баштаган жергиликтүү бийлик өкүлдөрү, мекеме-ишканалардын жетекчилери, аталган коогалаңдын катышуучулары, ошондой эле маркумдардын үй-бүлөлөрү жана шаар тургундары катышышты.

Адегенде эстеликке гүлчамбарлар коюлуп, куран окулуп, андан соң каза тапкандардын эрдиктери баа жеткис экендиги баса белгиленди. Анткени, быйыл Баткен окуясынын катталганына туптуура 25 жыл толду. «Өзбекстан ислам кыймылынын» (ӨИК) террордук согушкерлери менен Кыргызстандын аскерлеринин 1999-2000-жылдардагы кагылышуусу «Баткен согушу», «Баткен окуясы» жана «Баткен коогалаңы» деген аталыштар менен тарыхта калды.

– Баткен окуясы — 1999-2000-жылдары Кыргызстанда болуп өткөн маанилүү жана тарыхий окуя сыңары баарыбыздын эсибизде. Биз бүгүн Кыргызстандын аймактык бүтүндүгүн бекем коргоп жатып, аскердик жана кызматтык милдеттерин абийирдүү аткарууда курман болгондорду эскерип турабыз. Мамлекеттин эгемендиги жана эркиндиги үчүн өмүрүн берген баатырлардын жаркын элеси дайыма жүрөгүбүздө! Баткен облусундагы күжүрмөн аракеттерге катышкандардын каармандыгы жана эрдиги эч качан унутулбайт! –  деп баса Тимур Мадияров.

Эске салчуу жагдай: Диний экстремисттердин тобу 1999-жылы август айынын башында Кыргызстандын Баткен районунунун аймагына басып киришип, аймакты өздөрүнүн аскер базасына айландыруу, жергиликтүү жаштардын башын айландырып өздөрүнө тартуу, алардан келечектеги баскынчыларды даярдоо максатын гана көздөшкөн. Кыргызстандын күч органдары, кошуна мамлекеттердин куралдуу күчтөрүнүн биргелешкен аракеттери менен согушкерлерди өлкө аймагынан сүрүп чыгарууга жетишкен. Бул куралдуу салгылашта Кыргызстандын 76 жараны курман болгон. Алардын 46 аскер кызматкери. 100дөн ашуун жаран түрдүү даражада жараат дагы алышкан. Куралдуу кагылышуулар болгон чөлкөмдүн стратегиялык жана социалдык-экономикалык мааниси эске алынып, 1999-жылы 13-октябрда Баткен облусун түзүү жөнүндөгү өзгөчө мыйзамга кол коюлган.