24 Бардыгы /

Улуттук коопсуздук боюнча мамлекеттик комитеттин башчысы Камчыбек Ташиев кеңейтилген жана жаңыланган Ош-Ноокат автоунаа жолун ачты.

Бул иш-чарага ошондой эле Президенттин Ош облусундагы ыйгарым укуктуу Өкүлү Элчибек Жантаев, транспорт жана коммуникация министри Абсаттар Сыргабаев, райондордун акимдери жана жергиликтүү тургундар катышышты.

Камчыбек Ташиев баса белгилегендей, бул жолдун курулушу он жылдан ашык убакыт мурун башталган, бирок аягына чыкпай калган:

– Мунун айынан Ноокат менен Баткендин тургундары жапа чегип келишти. Президент бизге каттамдын курулушун быйыл бүтүрүү тапшырмасын берди. Үч ай мурун мен бул жерде жүрүп, тиешелүү бөлүмдөрдүн жетекчилери менен жолуккан элем. Бүгүн моминтип Ош-Раззаков автоунаа жолунун Ноокат бөлүгүн ачып жатабыз.

Президенттин Ош облусундагы ыйгарым укуктуу Ъкүлү Элчибек Жантаев бул жолдун абалы кейиштүү экендигин, автоунаа тыгындарынан тышкары эл үчүн ыңгайсыздыктарды жараткандигин баса белгиледи. Анын айтымында, 2023-жылы облуста 112,6 чакырым жолго асфальт төшөлөт. 2024-жылдын тогуз айында 99,11 чакырым жолго асфальт төшөлгөн. Анын 17,53 чакырымы Ош-Баткен-Раззаков автоунаа жолунун Ноокат тилкеси. Бул жолдун калган бөлүгү 2025-жылы бүткөр\лът. Эл аралык маанидеги курулган жол төрт тилкелүү. Ал жерде жарыктандыруу, ирригация, трассаны жана тротуарларды жашылдандыруу иштери жүргүзүлөт.

Кошумчалай кетчүү жагдай: Ош-Баткен-Раззаков автоунаа жолунун 63чү жана 43-чакырымдарында Абшыр-Сай жана Чили-Сай көпүрөлөрү курулган. Кыркол-Сай көпүрөсүнүн курулушу дээрлик 80 пайызга бүттү. Эске сала кетээрибиз: үстүбүздөгү жылдын июль айында УКМКнын башчысы Ноокаттагы жол жана көпүрөнүн курулушун октябрь айына чейин бүтүрүү тапшырмасын берген. Ал эми былтыр 30-августта Транспорт министрлигинин мурдагы жетекчиси Тилек Текебаев Ош-Баткен-Раззаков (Ноокат) унаа жолун асфальттоо иштери аяктаганын билдирген. Бирок анда аталган башкармалык 47 чакырым жолдун 13 чакырымын гана курган.

Министрлер кабинетинен билдиришкендей, Жапония эл аралык кызматташтык агенттиги (JICA) Ош-Баткен-Раззаков автожолунун курулушуна 133,58 миллион доллар бөлгөн. Анын 50 миллион доллары Ноокаттагы жолдун курулушуна (28-чакырымдан 75-чакырымга чейин). Жогорку Кеңештин мурунку депутаты Айбек Осмонов донорлор буга чейин 110 миллион доллар бөлүп бергени менен Транспорт министрлиги трассаны курууга беш жылдан бери тендер өткөрбөй келгенине нааразы болду. Андан соң башкармалыктын башчысынын орун басары Ырысбек Бариев Ноокат шаарына мамлекеттик бюджеттин эсебинен 13 чакырым жол курууну чечтик деп жооп кайтарды.

Алишер ТОКСОНБАЕВ өз кабарчы