12 Бардыгы /

Кыргыз Республикасынын Министрлер кабинетинин төрагасынын орун басары — УКМК төрагасы Камчыбек Ташиев Ош облусунун Кара-Суу районунда төрөлгөн 2 үй бүлөдөгү 3 эм наристелерден кабар алды.

Адегенде Камчыбек Ташиев Кара-Суудагы төрөт үйүнө баш багып, ал жерде 27-октябрда төрөлгөн 3 эмди көрдү. Үч эмдин ата-энеси Мырза Кыргызбаев жана Айжаркын Кыргызбаевалардын үй-бүлөсүнө өлкө башчысы Садыр Жапаровдун атынан 500 миң сом акчалай белек жана алгач УКМК кызматкерлери үчүн делип курулган Ош шаарынан 3 бөлмөлүү жаңы батирдин тийиштүү документтерин тапшырды. Ташиев аталган үй-бүлөнүн турмуш шартын мындан ары да көзөмөлдөп тураарын убадалады. Үч эмге Таңсулуу, Күнсулуу, Нурсулуу деген ысымдар ыйгарылган, абалдары жакшы.

Андан соң Камчыбек Ташиев Кара-Суу районундагы бир 3 эмдүү болгон Жоош айылындагы Мирлан Дастан уулу жана Нуриза Алмазбек кызынын үй-бүлөсүнөн кабар алды. Аталган наристелер ушул жылдын 12-октябрында жарык дүйнөгө келишкен. 2 уул, бир кыздуу болгон жаш үй-бүлөгө дагы ажонун атынан 500 миң сом акчалай белек-бечкек тапшырып, аларга дагы тез арада Ош шаарынан 3 бөлмөлүү батир белек кылышаарын убадалады. Бул үч эмге Атай, Бакай жана Асель ысымдары коюлган, абалдары жакшы. Атасы Мирлан Дастан уулу аскер кызматкери.

Маалыматка караганда, Ош облусуна караштуу Кара-Суу районунда 3 эм төрөлүшү акыры 17 жылдан бери алгачкы жолу катталып олтурат. Жакын арада дагы бир үч эм төрөлүүсү күтүлуп жаткандыгын, ал эненин саламаттыгы дарыгерлерден тыкыр көзөмөлүндө экенин Кара-Суу төрөт үйүнөн кабарлашты.

Алишер ТОКСОНБАЕВ, өз кабарчыбыз