42 Бардыгы /

Ош облусуна караштуу Араван райондук сотунун судьясы тарабынан кызмат абалынан кыянаттык менен пайдалануу, кызматтык жасалмачылык жана атайылап сот адилеттигине жатпаган чечим чыгаруу фактысы аныкталды. Бул туурасында Улуттук коопсуздук мамлекеттик комитетинен билдиришти.

Маалыматка караганда, Араван райондук сотунун судьясы Д.Н.Б. кызмат абалынан кыянаттык менен пайдаланып, а түгүл жеке баюу кызыкчылыгын көздөп, жаран З.Б.га Араван районунун аймагында жайланышкан жер тилкесине менчик укугун таанып, билип туруп адилетсиз чечим чыгарган. Ошол эле учурда бул чечим 2023-жылдын 25-январында сот отуруму учурунда каза тапкан күбө А.К. нын көрсөтмөлөрүнүн негизинде гана чыгарылган. Деген менен өлүм күбөлүгүнө ылайык, аталган жаран 2023-жылдын 1-январында эле өлгөн экен. Мындан тышкары сот отурумунун протоколуна ылайык процесстин жүрүшүндө Г.Э. жана Ю.Т. күбө катары дагы суралгандыгы белгиленген. Бирок, тергөөнүн жүрүшүндө көрсөтүлгөн адамдар соттук отурумдарга таптакыр катышпагандыгы жана каралып жаткан иштин жагдайлары боюнча судья Д.Н.Б. эч кандай көрсөтмө бербегендиги аныкталды.

Жогоруда көрсөтүлгөн жагдайлар күбөлөрдүн П.С. жана Т.А.нын көрсөтмөлөрү, ошондой эле соттук-кол жазма экспертизасынын корутундусу менен тастыкталды. Ошентип, 2025-жылдын 13-февралында Судьялар кеңеши судья Д.Н.Б.ны кылмыш жоопкерчилигине тартууга аргасыздан макулдук берип олтурат. 2025-жылдын 17-февралында жүргүзүлгөн ыкчам-иликтөө иш-чараларынын жыйынтыгы менен Д.Н.Б. Кыргыз Республикасынын Кылмыш-Жаза Кодексинин «Кызматтык абалынан кыянаттык менен пайдалануу», «Кызматтык жасалмачылык» жана «Атайылап адилетсиз чечим чыгаруу» беренелери менен айыпталып, тергөө аяктаганга чейин Кыргыз Республикасынын УКМКсынын тергөө абагына камакка алуу түрүндөгү баш коргоо чарасы тандалды.

Алишер ТОКСОНБАЕВ, өз кабарчы