30 Бардыгы /

Кыргыз Республикасынын УКМКсы тарабынан маңзаттардын мыйзамсыз жүгүртүлүшүнө каршы күрөшүү боюнча жүргүзүлүп жаткан иш-чаралардын жүрүшүндө «Тажикстан-Кыргызстан-Өзбекстан» багыты боюнча эл аралык наркоканалды уюштурган Ош облусунун айрым жашоочуларынан турган эл аралык уюшкан кылмыштуу топтун ишмердиги аныкталып, акыры буларга бөгөт коюлду.
Үстүбүздөгү жылдын 5-февралында жүргүзүлгөн атайын операциянын натыйжасында Ж.Х.Х .жана К.И.А. аттуу жарандар кармалган. Ж.Х.Х.нын үйүн тинтүү маалында 9 кило 793 грамм салмактагы 10 брикет «Афган Чарс» маңзаты жана 1 кило белгисиз синтетикалык заттын 1 брикети табылган. Ушул тапта аталган белгисиз заттын маңзаты экендигин аныктоо үчүн тиешелүү экспертизалар дагы жүргүзүлүүдө. Мындан тышкары К.И.А.нын үйүндө салмагы 133,99 граммды түзгөн «Афган Чарс» маңзатынын 1 брикети табылган.
Ошентип, жүргүзүлгөн тергөө иш-аракеттеринин натыйжасында уюшкан кылмыштуу маңзат тобунун мүчөлөрүнө карата Ош шаардык соту тарабынан Кыргыз Республикасынын Кылмыш-Жаза Кодексинин 282-беренеси боюнча айып тагылып, УКМКнын тергөө абагына камакка алуу түрүндөгү баш коргоо чарасы тандалган. УКМК маңзаттарды мыйзамсыз жүгүртүүгө каршы күрөшүү боюнча иштердин дагыле кызуу улантууда.