3 Бардыгы /

Оштук жарандык активист Бегай АШИРБАЕВА ушул тапта туптуура 24 жашка толуп олтурат. “Элим, барсыңбы!” коомдук кайрымдуулук фондунун эң активдүү мүчөсү бул сапар өздүк майрамын – туулган күнүн өзгөчө шартта гана белгилеп олтурат. Анткени, жаш айым Кыргызстандын Түштүк башкалаасындагы эң популярдуу “BERSAL” ресторанында 100 чакты майыпка “ЖАРЫК ЖАШОО- БИРГЕ МАЙРАМДАЙЛЫ!” деп татыктуу сый-урмат гана көрсөттү.

Мырзали ЖУМАБЕКОВ, Ош облусуна караштуу Өзгөн районундагы Кызыл-Маяк кыштагынын тургуну, экинчи топтогу майып: – Мекендешибиз Бегай Аширбаева – азамат! Анткени, туулган күнүндө Ош облусунун бардык райондорунан жана Ош шаарынан майыптарды бүтүндөй чогултуп, буларды бир үстөлгө олтругузуп, черин ачык  жазганга өбөлгө жаратты. Менимче, мындай салтты башкалар деле мындан ары ырааттуу улантышса, албетте, оорукчан мекендештеребиздин куп гана сообуна калышмак…

Динара РАЖАПОВА, Ош шаарынын тургуну, биринчи топтогу майып: – Ооба. Танып не. Адамдагы эң башкы байлык – бул ден соолук!Биз – ошол башкы байлыктын айрым мүчөсүнөн гана ажырагандарбыз. Демек, баары бир майыппыз. Андыктан, мындан ары бизди ДЕН СООЛУГУНАН М/МК/НЧ/Л/Г/ ЧЕКТЕЛГЕНДЕР деп шылдыңдабаңыздар? Ушуну туптуура түшүнүп, жарандык активист Бегай АШИРБАЕВА өздүк майрамында – туулган күнүндө моминтип бизге – майыптарга кайталангыс кубаныч жана күлкү-шат тартуулаганына миң мертебе шүгүр!

Субакан АШИРБАЕВА, жарандык активист Бегай АШИРБАЕВАнын апасы: – Кызым туулган күнүн – 24 жашын өзгөчө ушундай шартта белгилөөнү өзү бизге демилгеледи. Биз, бир туугандары, буга эч кандай каршылык көрсөтпөдүк. Тескерисинче, демилгени толук бойдон кубаттадык. Ылайым майып мекендештерибиздин бүгүнкү батасы кызыбызга толук тийип, турмаштан өз ордун тапсын! Андан ары агарып-көгөрсүн!

Бегай АШИРБАЕВА, “Элим, барсыңбы!” коомдук кайрымдуулук фондунун мүчөсү, жарандык активист: – Баса, “BERSAL” рестораны – Ош шаарындагы эң эле популярдуу жана ыңгайлуу ресторан. Менин майыптарды дал ушул коомдук жайда ырдатып- бийлетип, чоорлотуп-ойнотуп, анан ыраса черин жазсам деген тилегим орундалды. Мен дагы буларга – майыптарга мындан ары бекем ден соолук, жаркын маанай жана үй-бүлөлүк бакты-таалай гана тилемекчимин.

Кыскасы, 24 жашка эми гана толгон жарандык активист Бегай АШИРБАЕВА Ош жергесинде ойдо жок саамалыкка чыйыр салып олтурат. Кудай жалгап мындай мыкты жөрөлгөнү башка мекендештерибиз деле Кыргызстандын булуң-бурчунда үзгүлтүккө учуратпастан ыраттуу улантып кетишсе, алар деле мекенчилдиктин кашкайган үлгүсүн гана көрсөтүшмөк…

Алишер ТОКСОНБАЕВ, өз кабарчы, Ош шаары