30 Бардыгы /

Акыркы күндөрдө Тажикстандын башкалаасы Дүйшөмбү шаарында «Navruz World Youth Festival» аталышындагы Бүткүл Дүйнөлүк жаштар фестивалы өткөрүлдү. Анда Кыргызстан, Өзбекстан жана Тажикстан өлкөлөрүндө жаштар ишкердигин өнүктүрүүнүн жол-жоболору, Фергана өрөөнүнүн экологиялык көйгөйлөрү кең-кесири талкууланды. 

Аталган фестивалга Кыргызстандан 24 делегат катышты. Буларды ОшМУнун Студенттик Акыйкатчы аппаратынын башчысы Бектур Метиналы уулу жетектеп барды.  

– «Navruz World Youth Festival» аталышындагы Бүткүл Дүйнөлүк жаштар фестивалыкоңшулаш өлкөлөр ортосундагы кызматташтыктын жаңы этабын өнүктүрүү үчүн аянтча болду. «Глобалдык диалог: жаштар менен иштөөнүн мыкты тажрыйбалары» темасындагы панелдик сессияга дагы катыштык. Мындан тышкары аталган фестивалынын алкагында Худжанд шаарында өткөн Тажикстан, Кыргызстан жана Өзбекстан жаштарынын «Туруктуу өнүгүү үчүн кызматташуу» форумуна күбө болдук. Анда региондор аралык кызматташтыкты чыңдоо, Борбор Азия өлкөлөрүнүн жаштарынын ортосундагы достук жана ишкердик байланыштарды мындан ары өнүктүрүү, маданият жаатындагы биргелешкен демилгелер кенен-чонон талкууланды. Фестивалда ар кайсы өлкөлөрдүн өкүлдөрү менен дагы таанышып, жаны досторду таптык, – деп кошумчалады ОшМУнун Студенттик Акыйкатчы аппаратынын жетекчиси  Бектур Метиналы уулу.

 Баса, Дүйшөмбү шаарындагы «Navruz World Youth Festival» аталышындагы Бүткүл Дүйнөлүк жаштар фестивалына Кыргызстан, Өзбекстан, Казакстан, Азарбайджан, Зимбабве, Нигерия, Беларусия, Кытай жана башка көптөгөн өлкөлөрдүн жаштары катышты. 

Алишер ТОКСОНБАЕВ, өз кабарчы