24 Бардыгы /

Ош – Кара-Суу автоунаа жолун оңдоп-түзөө иштери бир жумадан кийин гана башталат. Бул туурасында президенттин Ош облусундагы өкүлү Элчибек Жантаев Кара-Суу районуна жасаган жумушчу сапарынын маалында ачыктады.

Ош облус жетекчисинин айтымында, бул маселе боюнча тиешелүү тараптар менен ишкер сүйлөшүүлөр жүргүзүлүп, бардык маселе дээрлик чечилди.

• Нариман айланмасынан баштап Кара-Суу шаарына чейинки 15

чакырым аралыкта жол төрт тилкелүү болуп, эки капталына тратуарлар, велосипед жолу жана жарыктандыруу менен заманбап үлгүдө гана жол курулат, – деп кошумчалады Ош облусунун жетекчиси Элчибек Жантаев.

Ошондой эле жергиликтүү бийлик жана тиешелүү тармактык кызматтарга жол курулуш иштери башталганга дейре бул жараянга ар тараптуу даярдык иштерин камсыздоо боюнча конкреттүү тапшырмалар дагы берилди.

Белгилей кетчүү жагдай: 2025-жылы Ош облусунун жол инфратүзүмүн жакшыртуу максатында өлкөнүн Турукташтыруу фондунан кошумча 4 миллиард бөлүндү. Мынча каражаттын негизинде Ош облусундагы стратегиялык мааниге ээ Өзгөн – Мырза-Аке – Кара-Кулжа автоунаа жолу, Ош – Баткен – Раззаков багытындагы Ноокат – Кызыл-Кыя жолунун калган бөлүгү дагы оңдолууда. Эми мындан ары Ош – Кара-Суу автоунаа жолу оңдолуп баштайт.

Алишер ТОКСОНБАЕВ, өз кабарчы