3 Бардыгы /

“Бүгүнкү күндө пенсиянын өлчөмү 7 миң сомдон башталат, бул жашоо минимумунан жогору. Октябрда индексация болот, анда пенсиялар дагы жогорулап, 7,5 миң сомго жетет”, – деди Министрлер Кабинетинин төрага орун басары Эдиль Байсалов радио эфиринде.

«Айыл жерлеринде жашаган калктын көбү мурда 1,5-2 миң сом пенсия алышып, ага да ыраазы болуп келишкен — анткени бул эч нерседен көрө жакшы деп эсептешчү. Бирок азыр алар кеминде 7 миң сом алышууда», — деди ал.

 Министрлер Кабинетинин төрага орун басары белгилегендей, социалдык сектор мамлекеттик бюджетке көз каранды, акыркы мезгилде маданият тармагындагы кызматкерлердин айлык маянасы жогорулап, жөлөкпулдар менен пенсиялардын өлчөмү өсүүдө.

«Биздин президент дагы көбүрөөк көтөрүүнү талап кылууда, ошондуктан эгерде Социалдык фондго түшкөн каражат көбөйсө, анда биз пенсияны 15-20 миң сомго чейин көтөрө алабыз», — деди Э.Байсалов.

Статистикалык маалыматтарга ылайык, 2024-жылы Кыргызстанда жашоо минимуму орточо эсеп менен жан башына айына 7 963,72 сомду түзгөн.