12 Бардыгы /

Ушул жылдын 4-мартынан 5-мартына караган түнү Өзгөн районуна караштуу Мырза-Арык айылында турак үйдү өрт чалып, төрт бала каза тапты. Бул туурасында Өзгөчө кырдаалдар министрлигинин Ош облустук башкармалыгынан билдиришти.

Өрттү өчүрүүгө эки бөлүм тартылып, таңкы саат 3:50дө гана толук бойдон өчүрүлдү. Бул кырсыктын кесепетинен сегиз, алты, беш жана үч жаштагы балдар каза табышты. Ушул тапта өрттүн келип чыгуу себептери такташтырылууда. Тиешелүү кызматтар териштирүү иштерин дагы жүргүзүп жатышат.

Бүгүн Өзгөн районунун акими Каныбек Апбасов жана Кароол Айыл Өкмөтүнүн башчысы Руслан Адайчиев өрт чалган үйдөн кабар алышты. Алардын айтымында, чоң эне бир бөлмөдө, ал эми балдар башка бөлмөдө укташкан экен.  Өрт жагылган электр тогунан тутанган деп жатышат. 4-марттан 5-мартка оогон түнү, саат эки-үчтөр чамасында жалын тутаныптыр. Балдар бүгүн түштөн кийин эле акыркы сапарга узатылып, жайга коюлат. .

Баса, былтыр октябрда дагы Ош шаарында турак үйдөн өрт чыгып, 34 жаштагы келин беш баласы менен каза тапкан эле. Ушул окуядан кийин президент Садыр Жапаров өрт коопсуздугу боюнча эл арасында түшүндүрүү иштерин күчөтүүнү тапшырган.

Алишер ТОКСОНБАЕВ, өз кабарчы