9 Бардыгы /

Акыркы күндөрү Кыргызстандын Түштүк башкалаасында өткөрүлүп жаткан «Agro Expo–2026» Эл аралык айыл чарба көргөзмө-жарманкесине Ош мамлекеттик университетинин Айыл чарба коллежи дагы абдан активдүү катышууда.

Аталган көргөзмөнүн алкагында ОшМУнун Айыл чарба коллежи тарабынан заманбап айыл чарба техникалары, малдарды диагностикалоо үчүн колдонулуучу жабдуулар жана жасалма уруктандыруу боюнча мүмкүнчүлүктөр кенен-чонон тааныштырылды. Бул иш-чарага ошондой эле студенттер дагы катышып, фермерлер менен дыйкандарга адистиктер туурасында өзунчө  маалымат беришип, а түгүл суроолоруна деле ынанымдууу жоопторду кайтарышты.

          «Agro Expo–2026» Эл аралык айыл чарба көргөзмө-жарманкесинде заманбап айыл чарба техникалары, сапаттуу үрөндөр, көчөттөр, жер семирткичтер жана айыл чарба продукциялары биринин артынан экинчиси сунуш этилди. Мындан тышкары адистер тамчылатып сугаруу системалары боюнча дагы кенен-чонон маалымат беришип, агрономдор атайын мастер-класстарды өткөрүштү. Ошондой эле фермерлер үчүн каржылоо мүмкүнчүлүктөрү туурасында дагы алгылыктуу маалыматтар айтылды. Бул Эл аралык көргөзмөгө коңшулаш Өзбекстан, Тажикстан жана Кытай өлкөлөрүнүн, ошондой эле жергиликтүү айыл чарба өндүрүүчүлөрүнүн өкүлдөрү байма-бай катышышып, өз продукцияларын сунуштап жатышат. Аталган иш-чара мындан тышкары лотерея ойнотуу жана шоу-программа менен дагы коштолууда.

          Баса, «Agro Expo–2026» Эл аралык айыл чарба көргөзмө-жарманкесинин эң негизги максаты – дыйкан-фермерлерге тажрыйба алмашуу үчүн заманбап шарттарды түзүү, жаңы өнөктөштөрдү табуу жана айыл чарба тармагына инвестиция тартууга зор мүмкүнчүлүк жаратуу.

АЛИШЕР ТОКСОНБАЕВ, өз кабарчы