36 Бардыгы /

Манас шаарынын прокуратурасы тарабынан 2026-жылдын 3 айында жер, экология, мамлекеттик кызмат жана билим берүү тармактарындагы мыйзамдардын аткарылышы боюнча бир катар текшерүүлөр жүргүзүлүп, олуттуу мыйзам бузуулар аныкталды.

Текшерүүлөрдүн жүрүшүндө Көк-Арт дарыясынын суу коргоо зонасында 114 мыйзамсыз курулуш объектиси жайгашканы аныкталып, “Жиахамей” ЖЧКты тарабынан мамлекеттик суу фондусунун жерине мыйзамсыз бетон заводу курулуп, жер казынасын пайдалануу талаптары бузулгандыгы такталып, натыйжада мамлекетке 7 884 000 сом зыян келтирилгендиги аныкталып жана прокурордук сунуштама киргизилип, анын негизинде келтирилген зыян мамлекеттин пайдасына өндүрүлгөн.

Ошондой эле №26 “Балапан” муниципалдык бала бакчасында жүргүзүлгөн текшерүүдө жетекчилик тарабынан балдарды мыйзамсыз кабыл алуу, акча каражаттарын жашыруун чогултуу жана жалган эмгек акы төлөө фактылары аныкталып, мамлекетке 263 334 сомдон ашуун зыян келтирилгендиги такталган. Аталган фактылар боюнча Кыргыз Республикасынын Кылмыш-жаза кодексинин 337-беренеси менен кылмыш иши козголуп, тергөө амалдары жүргүзүлүүдө. Келтирилген 263 334 сом материалдык зыян мамлекеттин пайдасына өндүрүлгөн.

Мындан сырткары, Манас шаардык билим берүү бөлүмүндө жүргүзүлгөн текшерүүдө мамлекеттик жана муниципалдык кызмат жөнүндө мыйзамдардын талаптары одоно бузулуп, кадрлар резервинде турбаган жарандар мыйзамсыз кызматка дайындалганы, документтер талаптагыдай жүргүзүлбөгөнү жана мамлекеттик кызматкерлер тарабынан ишкердик жүргүзүү фактылары аныкталган. Жыйынтыгында прокурордук сунуштама киргизилип, шаардык билим берүү бөлүмүнүн жетекчиси кызматынан бошотулган.Б.АБДЫЛЛАЕВ,Манас шаарынын прокурорунун жардамчысы