4,274 Бардыгы /

Бүгүн, 9-сентябрда Ысык-Көл областынын Чолпон-Ата шаарында көчмөндөрдүн бүткүл дүйнөлүк оюндарынын салтанаттуу ачылыш аземи кечки саат 20-00дө башталат. Көчмөндөрдүн бүткүл дүйнөлүк оюндарына болгон кызыгуулар аябагандай чон болууда. Чолпон-Ата шаарына караштуу Бозтери айыл аймагына караган бардык эс алуу жайлары республикабыздын 7 областтарынан жана Бишкек, Ош шаарынан келишкен атайын өкүлдөр менен спортчуларга жана чет өлкөлөрдөн келишкен меймандарга толук толгон. Массалык маалымат каражаттарынын кызматкерлери үчүн Чолпон-Ата шаарындагы ат майданында атайын басма сөз борбору ачылып, иштеп жатат. Көчмөндөрдүн бүткүл дүйнөлүк оюндарынын жүрүшү Кыргыз коомдук телеканалы аркылуу көрөрмандарга түз алынып берилет.

Жалал-Абад областынан келишкен өкүлдөр, маданият кызматкерлери менен спортчулар дагы көчмөндөрдүн бүткүл дүйнөлүк оюндарына активдүү катышуу менен байгелүү орундарды камсыз кылуунун аракеттерин көрүп жатышат. Жалал-Абад областынан келген делегацияны Өкмөттүн Жалал-Абад областындагы ыйгарым укуктуу өкүлүнүн милдетин аткаруучу Жумагүл Эгамбердиева жетектеп, баштап жүрөт. Жалал-Абад областынан келген өкүлдөр Кырчын жайлоосуна 12 боз үйлөрдү тигишти жана коноктор менен чет өлкөлүктөргө кыргыз элинин “Кыз узатуу” салтын тартуулашат. Жалпысынан табияты кооз Кырчын жайлоосуна 100дөн ашуун кыргыздын боз үйлөрү тигилди.
Көчмөндөрдүн бүткүл дүйнөлүк оюндарынын негизги мелдештерине кирген улуттук оюндар: ордо, тогуз коргоол, көк бөрү, кыргыз жана казак күрөштөрү, эр эңиш жана алыш боюнча мелдештер Чолпон-Ата шаарындагы ат майданында “Рух-Ордо” эс алуу борборунда өтөрүлөт.
Көчмөндөрдүн бүткүл дүйнөлүк оюндарынын маданий программалар бөлүгүндө элечек, чий куурчак, шырдак, ала-кийиздердин көргөзмөлөрү уюштурулат. Республиканын ар кайсыл областтарынан келишкен өкүлдөр менен маданият кызматкерлери менен чеберлер келин алуу, чач өрүү, кыз узатуу, өрлүктөө сыяктуу каада-салттарды коноктор менен чет өлкөлүктөргө тартуулашат. Көчмөндөрдүн бүткүл дүйнөлүк оюндарынын жабылышы 14-сентябрда кечки саат 21-00 дө Чолпон-Ата шаарындагы ат майданында болуп, кыргыз жана чет элдик ырчылардын кеңири программасындагы концерти менен жыйынтыкталат

Жолдошбай Осмонов, журналист