4,974 Бардыгы /

Жалал-Абад шаарындагы Спутник кичи шаарчасында кубанычтуу окуя жүз берди. Шаарчанын З.Жамашев атындагы көчөсүндө «Мамалак» орус тилдүү билим берүү менчик борбору ачылып иштей баштады. Азырынча бул билим берүү борборунда 3 жаштан 7 жашка чейинки балдар кабыл алынып тарбияланууда. Биринчиси орто тайпа, экинчиси жогорку тайпа жана үчүнчүсү мектепке даярдоо тайпасы. Ар бир тайпадагы балдардын саны 12ден ашпайт.
«Мамалак» билим берүү борборунда балдарды тарбиялоо иштери негизинен орус тилинде жүргүзүлөт. Ошону менен бирге кыргыз, англис жана түрк тилдери кошумча сабактар катары окутулат. Борбордо балдардын талаптагыдай тарбиялануусу жана жакшы терең билим алуулары үчүн бардык ыңгайлуулуктар менен шарттар жаратылган. Заманбап окуу класстары, компьютердик бөлмө, жатакана, спорт залы, ашканасы жана сыртта балдар ойноп көңүл ачуучу аянтчасы бар. Ар бир тайпанын балдары үчүн алардын өзгөчөктөрүнө жараша ар тараптуу жагымдуу шарттар түзүлгөн. -Биздин «Мамалак» мектепке чейинки менчик билим берүү борборунун мамлекеттик бюджеттик балдар бакчаларынан башкы өзгөчөлүгү ар бир балага жекече мамиле жасоо жана алардын ар тараптуу жетилип чоңоюусуна, терең билим алууларына катуу көңүл бурулат. Биз үчүн ар бир бала өзүнчө личность жана инсан. Окутуу, эс алдыруу жана ар түркүн оюндар балдарды тажатып чарчатбашы жана аларды зериктирбеши зарыл. Ошондуктан биз мыкты тажрыйбасы бар адистерди тандап алдык,-дейт менчик билим берүү борборунун директору, КРнын элге билим берүүсүнүн отличниги Гүлнара Токторбаева.
«Мамалак» билим берүү борбору Жалал-Абад шаарындагы экинчи менчик балдар бакчасы болуп калды. Биринчи менчик «Симба» балдар бакчасы СМУ шаарчасында үзүрлүү иштеп жатат. Өнүккөн өлкөлөрдө менчик балдар бакчаларынын ачылышына ар тараптуу камкордуктар менен колдоолор гана көрсөтүлүп келет.

Жолдошбай Осмонов, Жалал-Абад шаары