1,266 Бардыгы /

Орусиялык мушкер Хабиб Нурмагомедов Невада штатынын Атлетикалык комиссиясынын чечими менен тогуз айга беттештерден четтетилди.

Буга мушкердин UFC чемпиондугу үчүн былтыр октябрда ирландиялык Конор Макгрегорго каршы беттешинен кийинки аракеттери себеп болгон.

Муну менен катар орусиялык мушкер 500 миң доллар өлчөмүндө айыппул дагы төлөйт. Мындан тышкары Хабибдин бир тууганы Абубакар менен спаринг-өнөктөшү Зубайра Тухугов 25 миң доллардан айыппул төлөөгө милдеттендирилип, бул уюмдун иш-чараларына катышуудан бир жылга четтетилишти.

Эгер Хабиб кодулоого каршы акцияларга катышса, анын тогуз айлык мөөнөтү алты айга чейин кыскартылышы мүмкүн.

Атлетикалык комиссиянын чечими менен Конор Макгрегор дагы алты айга беттештерден четтетилип, 50 миң доллар өлчөмүндө айыппул төлөөгө милдеттендирилди.

Беттештин алдында Макгрегор менен Нурмагомедовдун ортосундагы мамиле кескин курчуп кеткен. Нурмагомедовдун жеңиши менен аяктаган беттештен кийин орусиялык мушкердин командасынын үч мүчөсү, анын ичинде машыктыруучусу Ризван Магомедов Макгрегордун командасы менен мушташ чыгарып, кармалышкан. Анда UFC уюмунун президенти Дэйна Уайт Нурмагомедов бул аракети үчүн «айып төлөп же беттештерден четтетилиши мүмкүн» экенин, эгер ал мөөнөт узак болсо мушкер титулунан ажыратыла турганын айткан.

Нурмагомедовдун жеңиши бүткүл КМШ өлкөлөрүндө ММА беттештерине болгон кызыгууну күчөтүп, Хабиб кийип жүргөн дагестандык ак бапактарга болгон суроо-талап кескин өскөн.

www