1,753 Бардыгы /

БАТКЕН. Баткенде буга чейин аскер кызматында эмгектенишип, ардактуу эс алууга узатылган ардагерлер үч айлык компьютердик курстан өтүштү. Соңунда ардагерлерге сертификаттар тапшырылып, буга Кыргыз Өкмөтүнүн Баткен облусундагы ыйгарым укуктуу өкүлүнүн орун басары Чынара Саттарова катышты.

• Сиздердин азыр дагы мамлекетибиздин өнүгүшүнө салым

кошууга  күч-кубатыңыздар, билимиңиздер жетет. Ошондуктан, заман агымынан артта калбай, компьютердик сабаттуулук жаатында дагы билимиңиздерди өркүндөтүп жатканыңыздар эң туура деп эсептейин. Анткени, коомдун өнүгүшү менен учур бизден технология жаатында дагы өнүгүүнү талап кылып жаткан чагы. Жалпыңыздарга маалым, быйылкы жыл Кыргыз Республикасынын Президенти тарабынан “Аймактарды өнүктүрүү жана өлкөнү санариптештирүү” жылы деп жарыяланбадыбы. Демек, бара-бара элге кызмат көрсөтүү бүт санариптештирилет. Албетте, мындай аракеттер коррупциялык көрүнүштөрдү жоюуга, калкка ыкчам жана ыңгайлуу кызмат көрсөтүүгө гана өбөлгө болоору шексиз! – деди Кыргыз Өкмөтүнүн Баткен облусундагы ыйгарым укуктуу өкүлүнүн орун басары Чынара Саттарова. 

Айтмакчы, ардагер жана учурда иштеп жаткан аскер кызматкерлерин  компьютердик сабаттуулукка үйрөтүү курстары НАТО менен Кыргыз Республикасынын Куралдуу Күчтөрүнүн Башкы Штабынын ортосундагы кызматташтыктын алкагында түзүлгөн НАТО-Кыргызстан программасынын негизинде “LINGOCOMP“ компьютердик борбору БатМУнун базасында  уюштурулду.

Атайын курстун негизги максаты: ардагер жана учурда иштеп жаткан аскер кызматкерлерине пенсияга чыккандан кийин эмгек рыногунда өз ордун табуусуна. маалыматтык технологиялар жаатында кесиптик чеберчиликке үйрөтүү, компьютердик сабаттуулугун жогорулатууга, алардын жашоо-шарттарын жакшыртууга багыт берүү.

Мындай курстар 2017-жылы дагы уюштурулуп, 17 угуучу үч айлык окууну ийгиликтүү аяктап, атайын сертификатка ээ болушкан. А быйыл жыл башында эле 18 угуучу-ардагер атайын курстан өтүштү.

Алишер ТОКСОНБАЕВ, өз кабарчы