1,494 Бардыгы /

БИШКЕК.Кыргыз Республикасынын Президенти, Куралдуу Күчтөрдүн кол башчысы Сооронбай Жээнбеков Бишкек шаарындагы Советтик аскерлердин Оооганстандын чыгарылышынын 30 жылдыгына арналган салтанаттуу  иш-чарага катышты.

Адегенде Президент Сооронбай Жээнбеков Ооган согушунун ардагерлеринин  аскердик милдетин аткаруудагы эрдигине таазим этип, алардын эрдиги Мекенди коргоонун бийик үлгүсү болуп кала берээрин билдирди. Ошондой эле Ооган согушунан  кайтпай калгандардын, Мекенине келгенден кийин курман болгондорду дагы жылуу эскерип, үй-бүлөлөрүнө жана жакындарына терең кайгыруу менен көңүл айтты.

Маркумдардын жаркын элесин эскерүү максатында бир мүнөттүк эскерүү дагы жарыяланды.

– Ооган согушуна катышкан аскерлердин эрдиги жаштарыбыз үчүн Мекенге ак кызмат кылуунун, мекенчилдиктин, Мекенин коргоонун үлгүсү болуп кала берет! — деп баса белгиледи Кыргыз Республикасынын Президенти, Куралдуу Күчтөрдүн Кол Башчысы Сооронбай Жээнбеков.  – Тогуз жылдан ашык созулган Ооган согушу миллиондогон адамдардын жүрөгүндө өчпөс так калтырды. Миңдеген мекендештерибиз уулдарынан, бир туугандарынан, аталарынан, өмүлүк жарынан ажырашты. Ооган согушунда 248 кыргызстандык мекендешибиз баатырларча курман болду. Бир жарым миң жоокерибиз жаракат алып, кырчындай болгон чагында майыптын кейпин кийишти.  Аскердик милдетин каармандык менен аткарган бардык мекендештерибиздин эрдигине биз башыбызды ийип, аларга терең урматыбызды билдиребиз. Кырчындай жаш өмүрүн курмандыкка чалган баатырларыбыздын элесине таазим этип, алардын каармандыгын түбөлүккө даңктайбыз!

Кыргыз мамлекетинин башчысы сөзүн жыйынтыктап жатып, мамлекет экономикалык мүмкүнчүлүгүнө жараша Ооган ардагерлерине социалдык колдоосун үзбөй көрсөтүп келаткандыгын, башка социалдык-экономикалык маселелердин катарында алардын дагы көйгөйлөрү ырааты менен чечилээрин убадалады. Ошондой эле Ооганчыжоокерлердин тажырыйбасы азыр дагы Куралдуу Күчтөргө, укук коргоо органдарына, мамлекеттик жана коомдук уюмдардын ишине өтө керектигин дагы баса белгиледи.

            Салтанаттуу жыйында Ооогстан согушунун ардагерлеринин республика боюнча Кеңешинин жетекчиси, Жогорку Кеңештин депутаты Кожобек Рыспаев жана Ооган согушунун  ардагерлеринин Кыргыз коомдук кыймылынын төрагасы Абдыгул Чотбаев чыгып сүйлөштү. Ооган согушунун ардагерлерине  сыйлыктар дагы тапшырылып, салтанаттуу жыйын чоң концерт менен жыйынтыкталды.

Алишер ТОКСОНБАЕВ, өз кабарчы