3,979 Бардыгы /

Жалал-Абадда Жаш ишкерлер ассоциациясы тарабынан  уюшулган ишкер айымдар форуму болуп өттү. Ага Таластан, Оштон, Бишкектен келген ишкер айымдар, район-шаарлардагы жана жергиликтүү ишкер айымдар катышты.

Иш чарада “Бизнестеги айым ишкерлердин орду” деген темада пленардык талкуу болуп, “Сладости Багери” компаниясынын жетекчиси Гүлжамал Караева, “BAIRA” мода үйүнүн түзүүчүсү Толгонай Керимкулова, “Ololohaus” коворкинг борборунун жетекчиси Айнура Аманалиева, “Центр Радости Ош” компаниясынын жетекчиси Гүлнура Абылкасымовалар ишкер айымдар менен бизнести өнүктүрүүгө байланыштуу өз кеңештери менен бөлүшүштү. Андан сырткары иш-чара суроо-жооп менен коштолду.

Форум жана анын максаты жөнүндө уюштуруучулардын бири Жалал-Абад ЖИАнын аткаруучу директору Аззамбек Жээнбай уулу өз сөзүндө:

“Жалал-Абадда айым шкерлер көп, алар өтө активдүү. Биздин ассоциациябызда 120 ишкер болсо, анын 36сы айым ишкерлер. Көпчүлүк ишкерлер бизнести баштап, кандайдыр бир деңгээлге жеткенде аны өнүктүрүп кетүүсү кыйын болот. Бүгүнкү форумда пленардык талкуу уюштурдук. Анда алдыңкы ишкер айымдарды чыгарып, жалпы бизнестеги айым ишкерлер менен тажрыйба бөлүштү. Форумдун максаты бизнестеги ишкер айымдарга жол көрсөтүү” -дейт.

“Kyrgyz Concept” компаниясынын директору  Эмил Уметалиев “Аарылар” деген темада презентация жасады. Аарылар менен чымындарды салыштыруу аркылуу жашоого байланышкан кеп-кеңештер берилип,  ишкерлерге мотивация болду.

“Аль-Фараби” мода үйү, “Нарктуу” улуттук кийимдер салону, “BAIRA” мода үйү тарабынан мода көргөзмөсү көрсөтүлүп, мыкты ишкер айымдар ыраазычылык каттар, ардак грамоталар менен сыйланышты.

Ишкерлер тарабынан өндүрүлгөн продукттар жарманкеге коюлган. Катышуучулар үчүн атайын кофе брейк жана түшкү тамак уюштурулган. Андан соң ишкер айымдарга сулуулук боюнча мастер-класстар кѳргөзүлүп,  иш-чара жыйынтыкталды.

“Аймак”