29,474 Бардыгы /

Бүгүн, 3-мартта Жалал-Абадда мамлекеттик туунун кабыл алынган жана ак калпак күнү белгиленди. Ага Өкмөттүн ыйгарым укуктуу өкүлүнүнүн орун басары Мамасалы Акматов, шаардын мэри Мураталы Тагаев, шаардык кеңештин депутаттары, областтык ардагерлер кеңешинин төрагасы, мекеме- ишканалардын жетекчилери жана жергиликтүү тургундар жана жогорку окуу жайлардын студенттери катышышты.

Иш чаранын жүрүшүндө мамлекеттик туу алып кирилди, Өкмөттүн ыйгарым укуктуу өкүлүнүн орун басары Мамасалы Акматов, шаардын мэри Мураталы Тагаев каалоо тилектерин айтышты.

“Биз өз тарыхыбызды жана салтыбызды баалайбыз. Бүгүн эгемендүү Кыргызстандын тарыхында маанилүү күндөрүнүн бири мамлекеттик туу күнүн белгилеп жатабыз. Туубуздун кызыл түсү кыргыз элинин байыркы эл экенин далилдеп,акыйкаттыкты, каармандыкты  билдирет. Нурга бөлөнгөн алтын күн бак-дөөлөттүн символу болуп саналат. Түндүк ата-конуштун укум-тукумун улоонун Кыргызстан элдерине жана ааламдын элдерине мээрман экени талашсыз“-дейт М.Акматов.

“Шаарыбыздын тургундары жана коноктору сиздерди Кыргыз Республикасынын Мамлекеттик Туусунун кабыл алынгандан бери 27 жылдыгы, 5-мартта белгиленүүчү ак калпак күнү менен куттуктаймын. Баарыбызга маалым болгондой Мамлекеттик Туу ар бир өлкөнүн бийик символу болуп саналат. Мамлекеттин эгемендигин даңазалап, тастыктап башкалардан өзгөчөлөнүп турат“-дейт М.Тагаев.

Иш-чара шаар тургундарына жана жаштарга өзгөчө дем берүү менен мекенчилдик сезимге үндөгөнүн билдиришти.

“Негизи бүгүн Туунун кабыл алынган күнү. Аны менен кошо Ак калпак күнү да белгиленип жатат. Бул жерде калпак жана жоолук салынгандарды көрүп, улуттук баш кийимдерибиздин баалуу экендиги көрүнүп турат. Өлкөбүздүн желеги бийиктиктерде желбиреп жүрө беришине тилектешмин”- дейт Сальфия Шайырбек кызы, студент.

“Бүгүнкү иш чара өзгөчө болуп, патриоттук сезимди ойготту. Жаанга карабай  көп эл чогулуп, мыкты демилге болду. Бардык кыргыз элимдин бүгүнкү майрамы менен куттуктайм. Кыргызстан өркүндөп, өсө берсин!”-дейт Абдиназар Орунбаев, студент.

Андан соң чакан концерттик программа менен иш-чара жыйынтыкталды.

Акылай Карабаева, “Аймак”