1,728 Бардыгы /

ВЕНА. Кыргыз Республикасынын Вена шаарындагы Бириккен Улуттар Уюмунун алдындагы Туруктуу Өкүлчүлүгү Венадагы Кыргыз диаспорасынын колдоосу аркасында бул калаадагы Бириккен Улуттар Уюмунун алдындагы Ооганстандын, Азербайжандын, Ирандын, Ирактын, Индиянын, Казакстандын, Пакистандын, Тажикстандын жана Өзбекстандын Туруктуу Өкүчлчүлүктөрү менен бирдикте “Нооруз” майрамына арналган иш-чарага катышты.

Салтанаттуу аземдин ачылышында БУУнун маңзаттар жана кылмыштуулук боюнча Башкармалыгынын аткаруучу директору Юрий Федотов жана дипломатиялык корпустун атынан Ирандын элчиси Kazem Gharib Abadi куттуктоо сөзүн сүйлөштү. Иш-чаранын расмий бөлүгү маалында сахнада ар өлкөлөрдүн, анын ичинде Кыргызстан жөнүндөгү тартылган видео роликтер көрсөтүлдү. Элибиздин тарыхы, маданияты, каада-салттары менен тааныштыруу максатында иш-чаранын жүрүшүндө Кыргызстандын кийизден, жибектен жасалган улуттук ар кандай буюм-тейимдеринин көргөзмөсү дагы өткөрүлдү.

Ошентип, салтанаттын расмий бөлүгүнүн соңунда коноктор Жаңы жылдын келишин билдирген, чыгыш элдердин меймандостугун кеңири чагылдырган ар түрдүү улуттук тамак-ашка мол болгон ар бир өлкөнүн үстөлдөрүнө чакырылып, коноктолду. “Нооруз”майрамын майрамдоо аземине Венадагы дипломатиялык корпустун, Эл аралык уюмдардын өкүлдөрү жана башка чакырылган меймандар дагы катышты.

Алишер ТОКСОНБАЕВ, өз кабарчы