1,914 Бардыгы /

 БАТКЕН. Кыргыз-Тажик чек арасында жүз берген окуяны эки өлкөнүн өкүлдөрүнөн куралган тергөө топтору тыкыр иликтейт. Кыргызстандын вице-премьер-министри Жеңиш Разаков Тажикстандын премьер-министринин орун басары Азим Иброхим менен жолукканда алгач элди тынчтандырып алып, андан кийин гана жол жана чек ара маселелерин талкуулоо зарыл экендигин ачыктады.

Жеңиш Разаков 14-марттан бери Баткендин Ак-Сай айылында Тажикстандын Өкмөтүнүн төрагасынын орун басары Азим Иброхим менен сүйлөшүүлөрдү жүргүзүп жатат. Ал Кыргыз-Тажик чек арасындагы абалды жөнгө салуудагы биринчи милдет – элди тынчтандыруу экендигин баса белгиледи: – Тажик тарап айткан маалымат боюнча, буларда каза болгондор дагы бар экен. Биз “Башкы прокуратура жана Ички иштер министрлиги катышкан биргелешкен тергөө топторун түзөлү»​ деп сунуштадык. Ар тараптуу тергеп, анан гана жыйынтыгын жетекчиликке билдиришине тапшырма бердик. Алар ушул тапта чогуу жумушту башташты.

            Кыргызстандын вице-премьер-министри Жеңиш Разаков Тажикстандын премьер-министринин орун басарыАзим Иброхим менен сүйлөшүүлөрү Баткен районунун Ак-Сай айыл өкмөтүнүн Көк-Таш айылындагы Головной тилкесинде өтүп жатат.

            Соңку сааттарда Кыргыз Өкмөтүнөн кабарлашкандай, 14-мартта Баткен районунун Ак-Сай жана Көк-Таш айылдарынын жергиликтүү тургундары кичи автобус менен Баткен шаарына жеткирилди. Алар №57-кесиптик лицейине жана С.Айтматов көчөсүндө жайгашкан үйлөрдүн бирине жайгаштырылды. Аларга Баткен районунда жана Баткен шаарында жашагандар дагы үйлөрүнөн баш паанек беришти.

            Ал эми Өзгөчө кырдаалдар министрлигинин Баткен шаардык жарандык коргонуу бөлүмүнүн башчысы Зайырбек Шакировдун айтымында, кеминде 450дөй адам көчүрүлүп келинди. Ал ырастагандай, тургундардын бир топ бөлүгүн Баткен районунда жана Баткен шаарында жашаган алардын туугандары деле өз үйлөрүнө алып кетишти.

 Алишер ТОКСОНБАЕВ, өз кабарчы