3,248 Бардыгы /

 ЖАЛАЛ-АБАД.  Ички иштер министрлиги калкка ыкчам жана сапаттуу кызмат көрсөтүү максатында «Бирдиктүү терезе» Борборун ачты. Анын ачылышына катышып жатып Ички иштер министри Кашкар Жунушалиев аталган мекеменин техникалык мүмкүнчүлүктөрү менен дагы жеринде таанышты.

 – Мындан ары жарандар керектүү документтерин топтош үчүн ар кайсыл инстанцияларга жүгүрүп таптакыр убара чегишпейт. Жаңы системага ылайык маалыматтарды алуу өтө эле жөнөкөйлөштүрүлдү жана адатка айланган жемкорлукка дагы биротоло чекит койдук, – дейт Ички иштер министри Кашкар Жунушалиев.

                        Ал эми Жалал-Абад облустук Ички иштер башкармалыгынын жетекчиси Кылычбек Жолдошев бардык шарттар жарандарга гана ылайыкташтырылгандыгын ырастады.

                        – «Бирдиктүү терезе» принцибине ылайык калкка мамлекеттик кызмат көрсөтүүлөр заман талабына жараша оптималдаштырылды. Жарандардын сураган документтерди бат жана сапаттуу алуусуна толук ыңгай жаратылды, – деп кошумчалады Жалал-Абад облустук Ички иштер башкармалыгынын жетекчиси Кылычбек Жолдошев.

 Ошентип, жалал-абаддыктар башка мекендештериндей эле мындан ары соттолгондугу, же соттолбогондугу жөнүндө күбөнаамаларды, куралдарды урунууга уруксат берилчү кагаздарды, ошондой эле башка баалуу документтерди аталган «Бирдиктүү терезе» Борборунан гана опоңой эле алганга мүмкүнчүлүк жаратылды.

Алишер ТОКСОНБАЕВ, өз кабарчы