3,524 Бардыгы /

ЖАЛАЛ-АБАД. Ала-Бука районундагы 1-Май айыл аймагына караштуу Ажек айылынын эли Нооруз майрамынын арапасында чоң белектин ээси болушту.

АРИС программасынын колдоосунда жаңы маданият үйүнүн ачылыш аземи болду.   Өткөн  жылы 1-майлыктар айылдын тарыхында болуп көрбөгөн ийгиликтерге жетишти.  Жылдын жыйынтыгы менен айыл аймагынын адистери жыл ичинде 103,2 миллион сом инвестиция тартып, айылдын чоң проблемаларын чечип алышты. Атап айтканда Нооруз майрамынын арапасында ачылып жаткан 300 орундуу   маданият үйүнүн жаңы имаратынын ачылышы болду. Элдин кубанычы чексиз.   Өткөн жылы таза суу сактоочу жана бөлүштүрүүчү жай куруп 5 айылды таза суу менен камсыз кылып ар бир үйгө таза суу киргизилди. Айылдын борбору болгон Айры- Там айылына кичи футболдук аянтча курулса маданият үйүнүн айланасы тосмолонду. Ошондой 2 насостук станция ишке киргизилди.

Ажек айылында  Нооруз майрамы  айылдын эли үчүн кош майрам болду. Мектеп окуучулары да майрамдык маанайда жаз гүлүндөй ачылып, маанайлары көтөрүңкү. Айыл эли ат оюндарын да өткөрүп, улуттук тамак- аштардын, кол өнөрчүлүктүн көргөзмө жарменкесин уюштурушуп, андан сырткары сүмөлөк кайнатып, салтанатка келгендерге тартуулап жатышты. Маданият үйүнүн тасмасын айыл айксакалдары менен Өкмөттүн областтагы өкүлүнүн орун басары Ырысбек Ызабеков бирге кыркып  ажектиктерди куттуктады. Ушул эле күнү Айры -Там айылында кичи футбол аянтчасынын да ачылышы болуп, “Ынтымак бар жерде ырыс бар” демекчи 1-майлыктартар үчүн кош кубаныч, кош майрам болду. 

Абдымомун КАЛБАЕВ, Ала-Бука району