1,437 Бардыгы /

Авлетим айыл өкмөтүнө караштуу 25 сотых жер талашка түштү. Жер чынында токой чарбасына караштуубу же мергенчилер коомунабы? Талашкан эки тараптын өкүлдөрүн Жалал-Абад областтык сотунун алдынан жолуктурдук. Көрсө сот иши 2 жылдан ашуун убакыттан бери уланып келе жаткан экен. Алгач Аксы райондук соту жер токой чарбасына тиешелүү деп чечим чыгарып берсе, областтык сот бир жарым жылдан бери аны кайра кароого жөнөтүп келген.

Аталган жерди 2003-жылы Аксы районунун тургуну Алмазбек Шадиев Авлетим токой чарбасынан 49 жылга ижарага алган. 2017-жылдан жерди областтык мергенчилер коому талашып, сот иштери башталган. Учурда жерге ээлик кылып турган Алмазбек Шадиевдин айтымында мергенчилер коомунун артында жеке кызыктар тараптар турат, анткени 15 жылдан бери тынч жүргөн мергенчилер бирден жерди талашып калуусу жөн жерден эмес дейт.

“2003-жылдан беш жылдык сыноо мөнөтү менен токой чарбасынан ижарага алганбыз. Андан кийин 49 жылга келишим түзүлгөн. Бардыгы мыйзам чегинде, документтерибиз бар. Ал жерге кайналы эгип, жакшы көрктөндүрүп карап жатканбыз. Дача курганга ылайыктуу жер, ошол үчүн да мергенчилер коому талашып жатат, алардын артында жеке кызыктар тараптар бар болушу мүмкүн”.

Ал эми областтык мергенчилер коомунун жетекчиси Исмаилов убагында мергенчилерге тиешелүү болгон жер токой чарбасына өтүп кеткендигин, болгону жерди кайра кайтарууну көздөп жүрүшкөнүн билдирди.

“Ал жер бош жаткан жер катары эсептелип, мамлекеттик каттоо кызматынан токой чарбасына катталат. Токой чарбасы болсо аны көп жылга ижарага берип салган. Жер мурунтан мергенчилерге таандык болгон, ал жерде мергенчилер үйү да жайгашкан, ошону далилдөө менен убарабыз”,-дейт Исмаилов.

Бир жылдан бери ишти артка кайтарып жаткан Жалал-Абад областтык соту бул ирет чечим чыгарып, анда Аксы райондук сотунун чечимин күчүндө калтырды. “Адилеттүү чечимге буга чейин карап келген сот эмес, жаңы дайындалган сот караганы себеп болду”, –дейт А. Шадиев.

Анткен менен мергенчилер коомунун жетекчиси Исмаилов өз интервьюсунда бул иш менен акырына чейин барарына, областтык соттон кийин жогорку сотко, керек болсо президентке чейин кайрылуу жасарын билдирди.

Роза АКМАТЖАН кызы, “Аймак”